નવી દિલ્હી : બાબા રામદેવની કંપની પતંજલિ આયુર્વેદને તેની ચ્યવનપ્રાશની જાહેરાતમાં અન્ય કંપનીઓના ઉત્પાદનો માટે 'છેતરપિંડી' (Cheating) શબ્દનો ઉપયોગ કરવા બદલ દિલ્હી હાઈકોર્ટમાં કડક ટીકાનો સામનો કરવો પડ્યો છે. ડાબર કંપનીએ આ જાહેરાત વિરુદ્ધ અરજી દાખલ કરી હતી, જેને સાંભળતા ન્યાયાધીશ તેજસ કારિયાની બેન્ચે પતંજલિને સીધો પ્રશ્ન કર્યો હતો.

જસ્ટિસ કારિયાએ ટિપ્પણી કરી, "તમે અન્ય બધી કંપનીઓ દ્વારા બનાવેલા ચ્યવનપ્રાશને કેવી રીતે છેતરપિંડી કહી શકો છો?" તેમણે ભારપૂર્વક જણાવ્યું કે પતંજલિ તેના ઉત્પાદનને શ્રેષ્ઠ કહી શકે છે, પરંતુ અન્ય કોઈના ઉત્પાદનને 'છેતરપિંડી' કહેવું યોગ્ય નથી. કોર્ટે કહ્યું કે 'છેતરપિંડી' એક નકારાત્મક અને અપમાનજનક શબ્દ છે, અને જાહેરાતમાં આ શબ્દનો ઉપયોગ કરીને લોકોને છેતરાયા હોવાનું સૂચવવામાં આવે છે, જે યોગ્ય નથી.

ડાબરનો દાવો: ડાબરે તેની અરજીમાં દાવો કર્યો હતો કે ચ્યવનપ્રાશના બજારમાં તેમનો ૬૧% બજાર હિસ્સો છે અને આ જાહેરાત તેમની પ્રતિષ્ઠાને કલંકિત કરે છે. ડાબરે પતંજલિના એ દાવા પર પણ સવાલ ઉઠાવ્યા હતા કે તેના ઉત્પાદનમાં ૫૧ ઔષધિઓનું મિશ્રણ છે. જાહેરાતમાં પતંજલિએ દાવો કર્યો હતો કે તેનું ચ્યવનપ્રાશ 'આયુર્વેદની સાચી શક્તિ' છે અને મોટાભાગના લોકો ચ્યવનપ્રાશના નામે છેતરાઈ રહ્યા છે. હાઈકોર્ટે આ કેસમાં બંને પક્ષોની દલીલો સાંભળીને પોતાનો નિર્ણય અનામત રાખ્યો છે.