મોદી સાથે વાતચીત સારી રીતે ચાલી રહી છેઃ હું ટૂંક સમયમાં ભારત જઈશ
યુએસ પ્રમુખ ટ્રમ્પે મોટી જાહેરાત કરીઃ મોદી મારા મિત્ર છે, અમે વાત કરતા રહીએ છીએઃ તેમણે મને ભારતની મુલાકાત લેવા આમંત્રણ આપ્યું છેઃ અમે તારીખ નક્કી કરીશું... વડાપ્રધાન મોદી એક મહાન માણસ છે, અને હું ભારતની મુલાકાત લઈશ : ભારત અને યુએસ વચ્ચે વેપાર કરાર પર વાટાઘાટો હજુ પણ ચાલુ છે. ટ્રમ્પે કહ્યું કે કેટલાક વેપાર મુદ્દાઓ પર મતભેદો છે, પરંતુ તેમની ટીમ તેના પર કામ કરી રહી છે
વોશિંગ્ટન તા.૭: યુએસ પ્રમુખ ડોનાલ્ડ ટ્રમ્પે કહ્યું છે કે વડા પ્રધાન મોદી સાથેની તેમની વાતચીત ખૂબ સારી રીતે ચાલી રહી છે અને તેઓ ટૂંક સમયમાં ભારતની મુલાકાત લઈ શકે છે. ગુરુવારે મીડિયા સાથેની વાતચીત દરમિયાન એક પ્રશ્નના જવાબમાં ટ્રમ્પે કહ્યું, અમારી વચ્ચે વાતચીત ખૂબ સારી રીતે ચાલી રહી છે. તેમણે મોટાભાગે રશિયા પાસેથી તેલ ખરીદવાનું બંધ કરી દીધું છે. મોદી મારા મિત્ર છે, અમે વાત કરતા રહીએ છીએ, અને તેમણે મને ભારતની મુલાકાત લેવા આમંત્રણ આપ્યું છે. અમે તારીખ નક્કી કરીશું... વડા પ્રધાન મોદી એક મહાન માણસ છે, અને હું ભારતની મુલાકાત લઈશ.
જ્યારે તેમને પૂછવામાં આવ્યું કે શું તેઓ આવતા વર્ષે ભારતની મુલાકાત લેશે, ત્યારે ટ્રમ્પે હસીને જવાબ આપ્યો, કદાચ, હા. જોકે, તેમણે ઉમેર્યું કે ભારત અને યુએસ વચ્ચે વેપાર કરાર પર વાટાઘાટો હજુ પણ ચાલુ છે. ટ્રમ્પે કહ્યું કે કેટલાક વેપાર મુદ્દાઓ પર મતભેદો છે, પરંતુ તેમની ટીમ તેના પર કામ કરી રહી છે.
જ્યારે બંને દેશો વચ્ચે છેલ્લા કેટલાક સમયથી વેપાર ચર્ચાઓ ચાલી રહી છે, ત્યારે અમેરિકા ઇચ્છે છે કે ભારત તેના બજારોને વધુ ખોલવા પર વિચાર કરે, જ્યારે ભારત કૃષિ અને ટેકનોલોજીમાં યુએસ છૂટછાટોની આશા રાખી રહ્યું છે. ટ્રમ્પના કાર્યકાળ દરમિયાન અનેક વેપાર કરારો પર પણ ચર્ચા થઈ હતી, પરંતુ કેટલાક મતભેદોને કારણે તે અધૂરા રહ્યા.
ટ્રમ્પે તાજેતરમાં ભારત-રશિયા તેલ વેપાર અંગે નિવેદન આપ્યું હતું. તેમણે કહ્યું હતું કે ભારત હવે રશિયા સાથે તેલ વેપાર મર્યાદિત કરશે. ટ્રમ્પે ગયા મહિનાથી આ મુદ્દા પર અનેક દાવા કર્યા છે. અગાઉ, તેમના ભાષણ દરમિયાન, ટ્રમ્પે ભારત સાથે પ્રારંભિક વેપાર કરારનો સંકેત આપ્યો હતો. તેમણે કહ્યું હતું કે ભારત અને અમેરિકા ટૂંક સમયમાં વેપાર કરાર પર હસ્તાક્ષર કરશે. જો કે, આ દરમિયાન, તેમણે આયાત ટેરિફને પણ અમેરિકાની તાકાત તરીકે પ્રકાશિત કર્યો હતો. ટ્રમ્પે ફરી એકવાર તેમની જૂની ભાવનાને પ્રતિબિબિત કરતા કહ્યું, જો તમે ભારત અને પાકિસ્તાનને જુઓ, તો હું ભારત સાથે વેપાર કરાર પર હસ્તાક્ષર કરવા જઈ રહ્યો છું, અને મને વડા પ્રધાન નરેન્દ્ર મોદી પ્રત્યે ખૂબ માન છે.
અમેરિકન રાષ્ટ્રપતિ ટ્રમ્પે દાવો કર્યો છે કે તેમના કાર્યકાળ દરમિયાન તેમણે આઠ યુદ્ધોનો અંત લાવ્યો હતો, જેમાંથી પાંચથી છ યુદ્ધો ફક્ત ટેરિફ (આર્થિક પ્રતિબંધો) દ્વારા બંધ થયા હતા. ટ્રમ્પે કહ્યું, જો તમે ભારત અને પાકિસ્તાનને જુઓ, તો તેઓએ એકબીજા સાથે લડવાનું શરૂ કર્યું. બંને પરમાણુ સશષ દેશો છે... તે સમયે આઠ વિમાનોને તોડી પાડવામાં આવ્યા હતા. પછી મેં બંનેને કહ્યું, જો તમે લડવાનું ચાલુ રાખશો, તો હું તમારા પર ટેરિફ લાદીશ.તેઓ આનાથી ખુશ નહોતા, પરંતુ ૨૪ કલાકની અંદર મેં તે યુદ્ધનો અંત લાવ્યો. ટ્રમ્પે આગળ કહ્યું, જો મારી પાસે ટેરિફનો વિકલ્પ ન હોત, તો હું આ યુદ્ધને રોકી શક્યો ન હોત.
ડોનાલ્ડ ટ્રમ્પ અને નરેન્દ્ર મોદી લાંબા સમયથી સારા સંબંધોનો આનંદ માણી રહ્યા છે. ટ્રમ્પે ૨૦૨૦ માં ભારતની મુલાકાત લીધી હતી, જ્યાં બંને નેતાઓએ અમદાવાદમાં નમસ્તે ટ્રમ્પ કાર્યક્રમમાં એકબીજાની પ્રશંસા કરી હતી. ટ્રમ્પના આ નિવેદનથી ફરી એકવાર ભારત-અમેરિકા સંબંધો અંગે નવી ચર્ચા શરૂ થઈ ગઈ છે.
(11:01 AM IST)
છેલ્લા 8 દિવસમાં સૌથી લોકપ્રિય 
