નવી દિલ્હી: ઉજ્જૈનમાં તકિયા મસ્જિદને તોડી પાડવાના મામલે મુસ્લિમ પક્ષને સુપ્રીમ કોર્ટ તરફથી મોટો ફટકો પડ્યો છે. મહાકાલ મંદિર માટે પાર્કિંગ વિસ્તાર વધારવાના હેતુથી મધ્યપ્રદેશ સરકાર દ્વારા મસ્જિદ તોડી પાડવામાં આવી હોવાના આક્ષેપ સાથે દાખલ થયેલી અરજીને સુપ્રીમ કોર્ટે આજે ફગાવી દીધી છે. ન્યાયાધીશ વિક્રમ નાથ અને સંદીપ મહેતાની બેન્ચે ચુકાદો આપતાં સ્પષ્ટ કર્યું કે તોડી પાડવા અને સંપાદનની કાર્યવાહી કાયદા અનુસાર કરવામાં આવી છે અને અસરગ્રસ્તોને વળતર પણ ચૂકવવામાં આવ્યું છે.

અરજદારોના વરિષ્ઠ વકીલ એમ.આર. શમશાદે દલીલ કરી હતી કે, "આ ખૂબ જ ગંભીર મામલો છે. માત્ર બીજા ધાર્મિક સ્થળ માટે પાર્કિંગની જરૂર છે, એટલે તમે અમારી ૨૦૦ વર્ષ જૂની મસ્જિદ તોડી પાડો છો?" તેમણે એ પણ રજૂઆત કરી કે હાઈકોર્ટનો તર્ક કાયદેસર રીતે ખામીયુક્ત છે. જોકે, સુપ્રીમ કોર્ટે હાઈકોર્ટના તર્કને માન્ય રાખ્યો અને કહ્યું કે અરજદારો પાસે વળતર અથવા સંપાદન સંબંધિત અન્ય કાયદાકીય ઉપાયો ઉપલબ્ધ છે. અરજદારો દ્વારા મસ્જિદને ૧૯૮૫માં વકફ તરીકે સૂચિત કરવામાં આવી હોવા છતાં, આ વર્ષે જાન્યુઆરીમાં 'ગેરકાયદેસર રીતે' તેને તોડી પાડવામાં આવી હોવાનો આરોપ મૂક્યો હતો.