નવી દિલ્હી: દિલ્હીના ઇન્દિરા ગાંધી આંતરરાષ્ટ્રીય વિમાનમથક (IGI) પર સુરક્ષા અને ઇમિગ્રેશન સિસ્ટમમાં એક ગંભીર ખામી સામે આવી છે. થાઈલેન્ડથી યુકે ડિપોર્ટ થઈ રહેલો એક બ્રિટિશ નાગરિક, જેની ઓળખ ફિટ્ઝ પેટ્રિક તરીકે થઈ છે, તે ૨૮ ઓક્ટોબરના રોજ દિલ્હી એરપોર્ટ પર અધિકારીઓને ચકમો આપીને કોઈ પણ ઔપચારિક કાર્યવાહી કર્યા વિના ઇમિગ્રેશન વિસ્તારમાંથી ભાગી ગયો અને શહેરમાં પ્રવેશ્યો.

આ ઘટનાની જાણ થતાં જ એરપોર્ટ પર હાહાકાર મચી ગયો હતો. આંતરરાષ્ટ્રીય પ્રવાસીના આ રીતે ભાગી જવાથી સુરક્ષા એજન્સીઓ પર મોટો સવાલ ઊભો થયો છે. દિલ્હી પોલીસના વરિષ્ઠ અધિકારીઓએ આ ઘટનાને 'સુરક્ષા ભંગ' તરીકે સ્વીકારી છે અને ભાગેડુ પેટ્રિકને શોધવા માટે દિલ્હી-NCRના સંભવિત છુપાવા અને બહાર નીકળવાના માર્ગો પર ટીમો તૈનાત કરવામાં આવી છે. સેન્ટ્રલ ઇન્ડસ્ટ્રિયલ સિક્યુરિટી ફોર્સ (CISF) અને બ્યુરો ઓફ ઇમિગ્રેશન સાથે મળીને દિલ્હી પોલીસે FIR નોંધી છે અને CCTV ફૂટેજની તપાસ શરૂ કરી છે, જેથી આ ભાગી જવાની ઘટનાનો ક્રમ અને તેમાં થયેલી ભૂલો જાણી શકાય. આ ઘટનાએ એરપોર્ટ સુરક્ષા વ્યવસ્થાની કાર્યક્ષમતા પર ગંભીર સવાલો ઉભા કર્યા છે.