નવી દિલ્હી : બાંગ્લાદેશના રાજકારણમાં ૫ ઑગસ્ટ, ૨૦૨૪ના રોજ થયેલા સત્તાપલટાની ઘટનાઓ પર આધારિત એક પુસ્તક "ઇન્શાલ્લાહ બાંગ્લાદેશ: ધ સ્ટોરી ઓફ એન અનફિનિશ્ડ રિવોલ્યુશન" માં સનસનાટીપૂર્ણ ખુલાસો કરવામાં આવ્યો છે કે તત્કાલીન વડાપ્રધાન શેખ હસીનાનો જીવ ભારતમાંથી આવેલા એક ફોન કોલને કારણે બચી ગયો હતો.

પુસ્તક મુજબ, જે દિવસે ટોળું હસીનાના સત્તાવાર નિવાસસ્થાન ગણભવન તરફ આગળ વધી રહ્યું હતું, તે દિવસે હસીના દેશ છોડવા તૈયાર નહોતા. તેમણે પોતાની બહેન અને પુત્ર સજીબ વાઝેદને પણ કહ્યું હતું કે, "હું મારા દેશથી ભાગી જવા કરતાં મરવાનું પસંદ કરીશ."

પરંતુ બપોરે ૧:૩૦ વાગ્યે અચાનક ભારતમાંથી એક ટોચના અધિકારીનો ફોન આવ્યો, જેમણે શેખ હસીનાને સ્પષ્ટપણે કહ્યું, "હવે ઘણું મોડું થઈ ગયું છે. જો તમે તાત્કાલિક ગણભવન છોડશો નહીં, તો ટોળું અંદર ઘૂસી જશે. તમારે જીવંત રહેવું પડશે, કારણ કે લડાઈ હજી પૂરી થઈ નથી."

આ ફોન કોલ બાદ હસીનાએ પોતાનો વિચાર બદલ્યો અને માત્ર ૨૦ મિનિટના ગાળામાં બપોરે ૨:૨૩ વાગ્યે હેલિકોપ્ટર દ્વારા ગણભવન છોડી દીધું. તેમનું વિમાન બપોરે ૨:૪૨ વાગ્યે ઉડાન ભરી અને પશ્ચિમ બંગાળના માલદા વિસ્તાર થઈને ભારતીય સરહદમાં પ્રવેશ્યું. મોડી સાંજે, ભારતીય વાયુસેનાના C-170J વિમાન દ્વારા તેમને ગાઝિયાબાદના હિંડોન એરબેઝ પર લાવવામાં આવ્યા, જ્યાં રાષ્ટ્રીય સુરક્ષા સલાહકાર અજિત ડોભાલે તેમનું સ્વાગત કર્યું હતું.