નવી દિલ્હી: ભારતીય રાજકારણના એક યુગપુરુષ, ભારતીય જનતા પાર્ટીના વરિષ્ઠ નેતા અને 'ભારત રત્ન'થી સન્માનિત લાલ કૃષ્ણ અડવાણી આજે (શનિવારે) તેમનો જન્મદિવસ ઉજવી રહ્યા છે. આ ખાસ અવસર પર, વડાપ્રધાન નરેન્દ્ર મોદી સહિત દેશના અનેક મોટા નેતાઓએ તેમને હૃદયપૂર્વક શુભેચ્છાઓ પાઠવી હતી.

વડાપ્રધાન મોદીએ સોશિયલ મીડિયા પ્લેટફોર્મ પર પોસ્ટ કરતાં લખ્યું, "લાલ કૃષ્ણ અડવાણીજીને તેમના જન્મદિવસ પર હાર્દિક શુભેચ્છાઓ. તેઓ એક મહાન દ્રષ્ટિ અને શાણપણ ધરાવતા રાજકારણી છે, જેમનું જીવન ભારતની પ્રગતિને મજબૂત બનાવવા માટે સમર્પિત રહ્યું છે. તેમણે હંમેશા નિઃસ્વાર્થ ફરજ અને મજબૂત સિદ્ધાંતોની ભાવનાને મૂર્તિમંત કરી છે. તેમના અમૂલ્ય યોગદાનથી ભારતના લોકશાહી અને સાંસ્કૃતિક પરિદૃશ્ય પર એક અમીટ છાપ પડી છે. ભગવાન તેમને સારા સ્વાસ્થ્ય અને લાંબુ આયુષ્ય આપે."

વડાપ્રધાન ઉપરાંત, કેન્દ્રીય મંત્રી મનોહર લાલ, શિવરાજ સિંહ ચૌહાણ અને લોકસભા સ્પીકર સહિત અનેક દિગ્ગજ નેતાઓએ પણ અડવાણીજીને અભિનંદન પાઠવ્યા. કેન્દ્રીય મંત્રી મનોહર લાલે તેમને 'ભાજપ પરિવારના આધારસ્તંભ' અને 'અસંખ્ય કાર્યકરો માટે પ્રેરણા' ગણાવ્યા. જ્યારે શિવરાજ સિંહ ચૌહાણે લખ્યું કે અડવાણીજીએ જ ભારતીય જનતા પાર્ટીના મૂળને પોષીને તેને એક વિશાળ વડનું વૃક્ષ બનાવ્યું છે. લોકસભા સ્પીકરે રાષ્ટ્રના કલ્યાણને પ્રાથમિકતા આપવાની તેમની પ્રતિબદ્ધતાને યાદ કરી.