નવી દિલ્‍હીઃ પશ્ચિમ બંગાળના હુગલી જિલ્લામાં માનવતાને શરમસાર કરતો એક અત્યંત ઘૃણાસ્પદ બનાવ સામે આવ્યો છે. અહીં તારકેશ્વર રેલ્વે સ્ટેશન પરિસર પાસે, એક ૪ વર્ષની માસૂમ બાળકીનું અપહરણ કરીને તેની સાથે દુષ્કર્મ આચરવામાં આવ્યું છે. શુક્રવારની મોડી રાત્રે બાળકી પોતાના માતા-પિતા સાથે મચ્છરદાનીમાં સૂતી હતી, ત્યારે કોઈ અજાણ્યા હેવાને તેને ઉઠાવી લીધી અને દૂર લઈ જઈને જઘન્ય કૃત્ય આચર્યું હતું.
વહેલી સવારે બાળકી ગુમ થતાં જ પરિવારજનોએ ભારે શોધખોળ શરૂ કરી હતી. કલાકોની જહેમત બાદ, બાળકી સ્ટેશન નજીક એક નાળા પાસે લોહીથી લથપથ અને બેભાન હાલતમાં મળી આવી હતી. બાળકીના શરીર પર, ખાસ કરીને તેના ગાલ પર દાંતના નિશાન (બચકાં) પણ મળી આવ્યા હતા, જે દર્શાવે છે કે આરોપીએ હેવાનિયતની તમામ હદો વટાવી દીધી હતી. બાળકીને તાત્કાલિક હોસ્પિટલમાં દાખલ કરવામાં આવી હતી, જ્યાં કલાકોની સારવાર બાદ પણ તેના ગુપ્તાંગમાંથી રક્તસ્રાવ ચાલુ હતો.
આ ઘૃણાસ્પદ ઘટનાના વિરોધમાં ભાજપના નેતાઓ અને કાર્યકરો હોસ્પિટલ પરિસરમાં ધસી આવ્યા હતા અને આક્રોશ વ્યક્ત કર્યો હતો. આ ઘટનાએ ફરી એકવાર રાજ્યમાં કાયદો અને વ્યવસ્થાની સ્થિતિ તેમજ મહિલાઓની સુરક્ષા પર ગંભીર સવાલો ઊભા કર્યા છે. સ્થાનિક પોલીસે કેસ નોંધીને આરોપીની શોધખોળ માટે સઘન તપાસ શરૂ કરી દીધી છે.
તારકેશ્વર રેલ્વે સ્ટેશન જેવા જાહેર સ્થળેથી બાળકીનું અપહરણ કરીને આ કૃત્ય આચરવામાં આવ્યું હોવાથી, આ ઘટનાએ સામાન્ય જનતામાં ગહેરી ચિંતા અને ભયનો માહોલ પેદા કર્યો છે. પોલીસ વહેલી તકે આરોપીને પકડીને કાયદાનું કડક શાસન સ્થાપિત કરે, તેવું સમગ્ર પંથકની જનતા ઈચ્છી રહી છે.