વોશિંગ્ટન: અમેરિકી પ્રમુખ ડોનાલ્ડ ટ્રમ્પે 'ટ્રુથ સોશિયલ' પર જાહેરાત કરી છે કે ટેરિફની આવકમાંથી મોટાભાગના અમેરિકન નાગરિકોને ૨,૦૦૦ ડોલરનું 'ડિવિડન્ડ' ચૂકવવામાં આવશે. તેમણે દાવો કર્યો કે અમેરિકા વિશ્વનો સૌથી ધનિક દેશ છે અને મોંઘવારી લગભગ શૂન્ય છે. આ જાહેરાત એવા સમયે આવી છે જ્યારે તેમની ટેરિફ નીતિઓની કાયદેસરતા સુપ્રીમ કોર્ટમાં ચકાસાઈ રહી છે. જોકે, આ યોજના માટે સંસદની મંજૂરી જરૂરી બનશે.

અમેરિકી પ્રમુખ ડોનાલ્ડ ટ્રમ્પે રવિવારે તેમની સોશિયલ મીડિયા સાઇટ 'ટ્રુથ સોશિયલ' પર એક મોટી જાહેરાત કરીને અમેરિકન નાગરિકોને મોટો આર્થિક લાભ આપવાનું વચન આપ્યું છે. ટ્રમ્પે જાહેરાત કરી કે તેમની સરકાર ટેરિફ (આયાત શુલ્ક) માંથી થતી જંગી આવકનો હિસ્સો નાગરિકોને 'ટેરિફ ડિવિડન્ડ' તરીકે વહેંચશે. આ યોજના હેઠળ, 'ઉચ્ચ આવક ધરાવતા લોકો' સિવાયના મોટાભાગના અમેરિકનોને વ્યક્તિ દીઠ ઓછામાં ઓછા ૨,૦૦૦ ડોલર ચૂકવવામાં આવશે

*ટેરિફ વિરોધીઓ 'મૂર્ખ' છે: ટ્રમ્પ*

પોતાની ટેરિફ નીતિનો જોરદાર બચાવ કરતાં પ્રમુખ ટ્રમ્પે લખ્યું, "જે લોકો ટેરિફની વિરુદ્ધ છે તેઓ મૂર્ખ છે! આપણે હવે વિશ્વના સૌથી ધનિક, સૌથી સન્માનિત દેશ છીએ, જ્યાં મોંઘવારી લગભગ શૂન્ય છે અને શેરબજાર રેકોર્ડ સ્તરે છે." તેમણે દાવો કર્યો કે ટેરિફને કારણે અમેરિકા 'ટ્રિલિયન ડોલર' (લાખો કરોડો ડોલર) કમાઈ રહ્યું છે અને ટૂંક સમયમાં દેશનું ૩૭ ટ્રિલિયન ડોલરનું જંગી દેવું ચૂકવવાનું શરૂ કરશે.

*જાહેરાતનો સમય મહત્વપૂર્ણ*

ટ્રમ્પની આ જાહેરાત એવા સમયે આવી છે જ્યારે તેમની આક્રમક ટેરિફ નીતિઓ સર્વોચ્ચ કાયદાકીય પડકારનો સામનો કરી રહી છે. અમેરિકી સુપ્રીમ કોર્ટ હાલમાં આ ટેરિફ લાદવા માટે પ્રમુખ દ્વારા ઉપયોગમાં લેવાયેલા 'આંતરરાષ્ટ્રીય ઇમરજન્સી ઇકોનોમિક પાવર્સ એક્ટ'ની કાયદેસરતા પર સુનાવણી કરી રહી છે.

*યોજનાના અમલીકરણમાં પડકારો*

જોકે, આ ૨,૦૦૦ ડોલરની ચુકવણીની યોજનાને અમલમાં મૂકવી સરળ નથી. અહેવાલો અનુસાર, આ માટે સંસદની મંજૂરી લેવી આવશ્યક બનશે. દરમિયાન, અમેરિકી ટ્રેઝરી સેક્રેટરી (નાણામંત્રી) સ્કોટ બેસેન્ટે સંકેત આપ્યો છે કે આ 'ડિવિડન્ડ' કદાચ નાગરિકોને સીધા ચેક આપવાને બદલે, વિવિધ 'ટેક્સ કટ' (કરવેરામાં રાહત) સ્વરૂપે આપવામાં આવી શકે છે.

નોંધનીય છે કે, પ્રમુખ ટ્રમ્પે 'ટ્રિલિયન ડોલર'ની આવકનો દાવો કર્યો હોવા છતાં, યુએસ ટ્રેઝરી વિભાગના સત્તાવાર આંકડા મુજબ, નાણાકીય વર્ષ ૨૦૨૫ માં ટેરિફની કુલ આવક આશરે ૧૯૫ થી ૨૧૫ બિલિયન ડોલર (અબજ ડોલર) રહી છે.