લંડન: બ્રિટનના જાહેર પ્રસારણકર્તા બીબીસી (BBC) માં ભૂતપૂર્વ યુએસ રાષ્ટ્રપતિ ડોનાલ્ડ ટ્રમ્પના એક ભાષણના સંપાદનને લઈને ઊભા થયેલા વિવાદે મોટો ભૂકંપ સર્જ્યો છે. આ વિવાદને પગલે બીબીસીના બે ટોચના અધિકારીઓ, ડાયરેક્ટર-જનરલ ટિમ ડેવી અને ન્યૂઝ ચીફ ડેબોરાહ ટર્નેસને રવિવારે રાજીનામું આપવાની ફરજ પડી છે. બંનેએ સંસ્થાની વિશ્વસનીયતા અને નિષ્પક્ષતા જાળવવા માટે આ નિર્ણય લેવામાં આવ્યો હોવાનું જણાવ્યું છે.

સમગ્ર મામલો 6 જાન્યુઆરી, 2021ના રોજ યુએસ કેપિટોલ હુમલાના દિવસે ટ્રમ્પ દ્વારા આપવામાં આવેલા ભાષણ સાથે સંબંધિત છે. બીબીસી પર આરોપ મૂકવામાં આવ્યો હતો કે તેણે ટ્રમ્પની ડોક્યુમેન્ટરીમાંથી ભાષણનો એક એવો ભાગ હટાવી દીધો હતો, જેમાં તેમણે પોતાના સમર્થકોને 'શાંતિપૂર્ણ રીતે વિરોધ' કરવાની અપીલ કરી હતી.

ટીકાકારોએ દાવો કર્યો કે આ સંપાદનથી ભાષણનો સાચો અર્થ બદલાઈ ગયો અને એવી ખોટી છાપ ઊભી થઈ કે ટ્રમ્પે હિંસા ભડકાવી હતી. આ સંપાદનના વિવાદે બીબીસી પર પક્ષપાત અને રાજકીય ઝુકાવના ગંભીર આરોપો મૂક્યા, જેનાથી સંસ્થાની સંપાદકીય પ્રામાણિકતા પર મોટો પ્રશ્નાર્થ ઊભો થયો.

રાજીનામું આપતા ડાયરેક્ટર-જનરલ ટિમ ડેવીએ સ્ટાફને લખેલા પત્રમાં જણાવ્યું કે તેઓ પાંચ વર્ષના કાર્યકાળ પછી સ્વેચ્છાએ પદ છોડી રહ્યા છે, જેથી સંસ્થા નવા નેતૃત્વ સાથે આગળ વધી શકે. બીજી તરફ, ન્યૂઝ ચીફ ડેબોરાહ ટર્નેસે સ્વીકાર્યું કે ટ્રમ્પ ડોક્યુમેન્ટરી વિવાદ એવા તબક્કે પહોંચી ગયો છે, જ્યાં તે બીબીસીની છબીને નુકસાન પહોંચાડી શકે છે, અને ન્યૂઝ અને કરંટ અફેર્સના સીઈઓ તરીકેની અંતિમ જવાબદારી તેમની છે.

આ ઘટનાએ પત્રકારત્વમાં નિષ્પક્ષતા માટે જાણીતી બીબીસીની વૈશ્વિક છબી પર ઊંડો ડાઘ છોડી દીધો છે.