પટના, તા. ૧૧ નવેમ્બર, ૨૦૨૫, મંગળવાર : બિહાર વિધાનસભા ચૂંટણી ૨૦૨૫ના બીજા અને અંતિમ તબક્કાનું મતદાન આજે સવારે ૭ વાગ્યાથી શરૂ થઈ ગયું છે. મતદાનને લઈને લોકોમાં ભારે ઉત્સાહ જોવા મળી રહ્યો છે, જેના કારણે જહાનાબાદ સહિત અનેક સ્થળોએ સવારે ૬ વાગ્યાથી જ મતદાન મથકો પર મતદારોની લાંબી કતારો લાગી ગઈ હતી.
અંતિમ તબક્કાની મુખ્ય વિગતો
આ અંતિમ તબક્કામાં બિહારના આશરે ૩.૭૦ કરોડ મતદારો કુલ ૧૨૨ બેઠકો પર મેદાનમાં રહેલા ૧૩૦૨ ઉમેદવારોના ભાવિનો નિર્ણય કરશે. મતદાન કુલ ૪૫,૩૯૯ મતદાન કેન્દ્રો પર થઈ રહ્યું છે, જેમાંથી ૪૦,૦૭૩ કેન્દ્રો ગ્રામ્ય વિસ્તારોમાં છે.
આ તબક્કામાં પશ્ચિમ ચંપારણ, પૂર્વી ચંપારણ, સીતામઢી, મધુબની, સુપૌલ, અરરિયા અને કિશનગંજ જિલ્લાઓનો સમાવેશ થાય છે. આ તમામ જિલ્લાઓ નેપાળની સરહદને અડીને આવેલા હોવાથી અહીં વિશેષ ચોકસાઈ રાખવામાં આવી રહી છે.
મહત્ત્વના ઉમેદવારોની પ્રતિષ્ઠા દાવ પર
આ બીજા તબક્કાના મતદાનમાં નીતીશ કુમારના મંત્રીમંડળના અડધો ડઝનથી વધુ મંત્રીઓ, જેમ કે બિજેન્દ્ર પ્રસાદ યાદવ (સુપૌલ), પ્રેમ કુમાર (ગયા ટાઉન), રેણુ દેવી (બેતિયા), નીરજ કુમાર સિંહ 'બબલુ' (છાતાપુર) અને JD(U)ના લેશી સિંહ (ધમદહા), શીલા મંડલ (ફુલપરાસ) તથા જામા ખાન (ચૈનપુર)ની પ્રતિષ્ઠા દાવ પર લાગી છે.
આ ઉપરાંત, પૂર્વ નાયબ મુખ્યમંત્રી તારકિશોર પ્રસાદ પણ કટિહાર બેઠક પરથી પાંચમી વખત જીત નોંધાવવા માટે મેદાનમાં છે. કટિહાર જિલ્લાની બલરામપુર અને કદવા બેઠકો પરથી અનુક્રમે ભાકપા (માલે) લિબરેશનના મહબૂબ આલમ અને કોંગ્રેસના શકીલ અહેમદ ખાન સતત ત્રીજી જીત માટે પ્રયત્નશીલ છે. એનડીએના ઘટક દળ ‘હમ'ની તમામ છ બેઠકો પર પણ આ જ તબક્કામાં મતદાન થઈ રહ્યું છે.
દિલ્હી બ્લાસ્ટ બાદ સઘન સુરક્ષા
દિલ્હીમાં સોમવારે સાંજે થયેલા બ્લાસ્ટ બાદ બિહાર પોલીસને અલર્ટ મોડ પર મૂકવામાં આવી છે. મતદાનને ધ્યાનમાં રાખીને રાજ્યમાં સુરક્ષાના વ્યાપક ઈન્તજામો કરાયા છે. ચાર લાખથી વધુ સુરક્ષાકર્મીઓ તૈનાત કરવામાં આવ્યા છે. સંવેદનશીલ અને અતિસંવેદનશીલ બૂથો પર CRPF જવાનોને તૈનાત કરાયા છે. બિહારની અન્ય રાજ્યો સાથે જોડાયેલી સીમાઓ પર પણ સુરક્ષા વધારી દેવામાં આવી છે.