નવી દિલ્હી : દિલ્હીમાં તાજેતરમાં થયેલા બોમ્બ વિસ્ફોટની તપાસ ચાલુ છે, ત્યા ઇન્ડિગો એરલાઇન્સને પાંચ આંતરરાષ્ટ્રીય એરપોર્ટને બોમ્બથી ઉડાવી દેવાની ધમકી આપતો ઇમેઇલ મળ્યો. ઇમેઇલમાં દિલ્હી, મુંબઈ, ચેન્નાઈ, તિરુવનંતપુરમ અને હૈદરાબાદ એરપોર્ટનો ઉલ્લેખ હતો. ધમકીભર્યા ઇમેઇલ મોકલવાથી સુરક્ષા એજન્સીઓમાં ગભરાટ ફેલાયો હતો અને તપાસ શરૂ કરવામાં આવી હતી. જોકે, હાલમાં તે સ્પષ્ટ નથી કે ઇમેઇલ કોણે અને ક્યાંથી મોકલ્યો છે.

દિલ્હી પોલીસના જણાવ્યા અનુસાર, ફાયર બ્રિગેડને સાંજે 4 વાગ્યે દિલ્હી એરપોર્ટ ટર્મિનલ 3 પર બોમ્બ ધમકી મળી હતી. તપાસ બાદ, આ સમાચાર ખોટા હોવાનું બહાર આવ્યું. દિલ્હી, ચેન્નાઈ અને ગોવા એરપોર્ટનો પણ ઉલ્લેખ કરતો ઇમેઇલ ઇન્ડિગોના ફરિયાદ પોર્ટલ પર મળ્યો હતો. તમામ સ્થળોએ સાવચેતીપૂર્વક તપાસ કરવામાં આવી હતી, પરંતુ કોઈ શંકાસ્પદ વસ્તુ મળી ન હતી.

આ દરમિયાન, મુંબઈથી વારાણસી જતી એર ઈન્ડિયા એક્સપ્રેસ ફ્લાઇટને પણ ઉડાન દરમિયાન બોમ્બ ધમકી મળી હતી. વિમાનનું વારાણસી એરપોર્ટ પર ઈમરજન્સી લેન્ડિંગ કરવામાં આવ્યું હતું અને તમામ મુસાફરોને સુરક્ષિત રીતે બહાર કાઢવામાં આવ્યા હતા. બોમ્બ સ્ક્વોડ દ્વારા વિમાનની તપાસ કરવામાં આવી હતી, પરંતુ કોઈ શંકાસ્પદ વસ્તુ મળી ન હતી.

એર ઈન્ડિયા એક્સપ્રેસના પ્રવક્તાએ જણાવ્યું હતું કે, "વારાણસી જતી ફ્લાઇટમાં સુરક્ષા ધમકી મળી હતી. સરકાર દ્વારા નિયુક્ત બોમ્બ ધમકી મૂલ્યાંકન સમિતિને તાત્કાલિક જાણ કરવામાં આવી હતી અને તમામ સુરક્ષા પ્રોટોકોલનું પાલન કરવામાં આવ્યું હતું. ફ્લાઇટ સુરક્ષિત રીતે ઉતરાણ કરવામાં આવી હતી અને મુસાફરોને સુરક્ષિત રીતે નીચે ઉતારવામાં આવ્યા હતા."