નવી દિલ્હી : કેન્દ્રીય નાણાં મંત્રી નિર્મલા સીતારમણે આજે આગામી કેન્દ્રીય બજેટ ૨૦૨૬-૨૭ ની તૈયારીઓ માટે નવી દિલ્હીમાં તેમની ત્રીજી પ્રી-બજેટ મીટિંગની અધ્યક્ષતા કરી હતી. આ બેઠકમાં સૂક્ષ્મ, લઘુ અને મધ્યમ ઉદ્યોગો (MSMEs) ક્ષેત્રના પ્રતિનિધિઓ સાથે ચર્ચા કરવામાં આવી હતી અને તેમના તરફથી આવશ્યક ઇનપુટ્સ મેળવવામાં આવ્યા હતા.

નાણામંત્રાલય દ્વારા સોશિયલ મીડિયા પ્લેટફોર્મ 'X' પર આ માહિતી આપવામાં આવી હતી. આ બેઠકમાં કેન્દ્રીય નાણા રાજ્યમંત્રી પંકજ ચૌધરી અને MSME મંત્રાલયના વરિષ્ઠ અધિકારીઓ પણ હાજર રહ્યા હતા.

MSME ની મુખ્ય માંગો અને સૂચનો: આ બેઠક પહેલા જાહેર કરાયેલા એસોચેમના (ASSOCHAM) અહેવાલમાં MSME ક્ષેત્રને પ્રોત્સાહન આપવા માટે નીચેના પગલાં સૂચવવામાં આવ્યા હતા:

સિંગલ-વિન્ડો ક્લિયરન્સ સિસ્ટમ: તમામ રાજ્યોમાં ડિજિટાઇઝ્ડ અને સમયસર સિંગલ-વિન્ડો ક્લિયરન્સ સિસ્ટમ રોકાણ વાતાવરણ સુધારવામાં 'ગેમ-ચેન્જર' બની શકે છે.

નિયમોનું સરળીકરણ: વ્યાપાર નિયમોને સરળ બનાવવા અને મંજૂરી પ્રણાલીમાં સુધારો કરવાની જરૂરિયાત પર ભાર મૂકવામાં આવ્યો હતો.

સરળ ફાઇલિંગ ચક્ર: કંપની કાયદા હેઠળ પાલનને સરળ બનાવવા માટે રજિસ્ટર્ડ MSME માટે દ્વિવાર્ષિક અથવા ત્રિવાર્ષિક ફાઇલિંગ ચક્ર શરૂ કરવાનું સૂચન કરવામાં આવ્યું હતું.

નાણામંત્રી નિર્મલા સીતારમણની પ્રી-બજેટ ચર્ચાઓ સતત ચાલી રહી છે, જેમાં અગાઉ ખેડૂત સંગઠનો અને દેશના અગ્રણી અર્થશાસ્ત્રીઓ સાથે પણ બેઠકો યોજાઈ ચૂકી છે.