પટણા: બિહાર વિધાનસભા ચૂંટણી ૨૦૨૫ ના પરિણામોની ગણતરી શરૂ થવાના ગણતરીના કલાકો પહેલાં રાજ્યનું રાજકીય વાતાવરણ અત્યંત તણાવપૂર્ણ બની ગયું છે. રાષ્ટ્રીય જનતા દળ (RJD) એ મતગણતરીમાં ગેરરીતિની આશંકા વ્યક્ત કરી ચૂંટણી પંચના અધિકારીઓને ખુલ્લી ચેતવણી આપી છે, જેના પર ભારતીય જનતા પાર્ટી (BJP) એ જોરદાર પલટવાર કર્યો છે.

RJD ના ગંભીર આક્ષેપો અને ચેતવણી: RJD સતત એક્ઝિટ પોલને 'ષડયંત્ર' ગણાવી રહી છે અને આક્ષેપ કરી રહી છે કે અધિકારીઓને ડરાવીને પરિણામોને પ્રભાવિત કરવાનો પ્રયાસ થઈ રહ્યો છે.

આક્ષેપ: RJD નેતા શિવચંદ્ર રામે દાવો કર્યો કે આ વખતે બિહારમાં તેજસ્વી યાદવ ની સરકાર બનશે, પરંતુ એક્ઝિટ પોલમાં જાણી જોઈને બેઠકો ઓછી બતાવીને શંકા ઊભી કરવામાં આવી રહી છે.

ધમકી: RJD એ ચેતવણી આપી છે કે જો મતગણતરીમાં કોઈ ગડબડ દેખાશે, તો "બિહારમાં એવો નજારો જોવા મળી શકે છે જેની કલ્પના પણ ન કરી હોય," અને ઉમેર્યું કે "બિહારમાં નેપાળ, બાંગ્લાદેશ જેવો નજારો જોવા મળશે."

અધિકારીઓને ચેતવણી: RJD નેતાઓએ સ્પષ્ટપણે કહ્યું કે જો કોઈ ગેરરીતિ જોવા મળી તો "યા તો ઉમેદવાર બહાર આવશે યા અધિકારી બહાર આવશે" અને રિટર્નિંગ ઓફિસર્સને "પહેલાં જેવો નજારો ન થાય" તે માટે સતર્ક રહેવાની સલાહ આપી છે.

BJP નો કડક જવાબ: RJD ની આક્રમક નિવેદનબાજી પર ભાજપે કડક પ્રતિક્રિયા આપી છે. BJP પ્રદેશ અધ્યક્ષ દિલીપ જયસ્વાલે કહ્યું કે, "બિહારમાં કાયદાનું રાજ છે, ગુણ્ડારાજ નહીં." તેમણે RJD પર હારની હતાશામાં આવા નિવેદનો આપીને મતદારોનું અપમાન કરવાનો આરોપ લગાવ્યો.

૨૪૩ બેઠકોવાળી બિહાર વિધાનસભામાં બહુમતીનો આંકડો ૧૨૨ છે, અને હવે સમગ્ર દેશની નજર ૧૪ નવેમ્બરના અંતિમ પરિણામો પર ટકેલી છે.