અસીમ મુનીર બનશે પાકિસ્તાનના પહેલા સીડીએફઃ બિલ પસાર થતાં બે ન્યાયાધિશોએ આપ્યું રાજીનામુ
પાકિસ્તાનમાં વિવાદાસ્પદ ૨૭મા બંધારણીય સુધારાને મંજૂરી મળતાં, અસીમ મુનીરને દેશના પ્રથમ સંરક્ષણ દળના વડા તરીકે નિયુક્ત કરવાનો માર્ગ મોકળો થયો
ઇસ્લામાબાદ તા.૧૪: પાકિસ્તાનની રાષ્ટ્રીય સભાએ ગુરુવારે લશ્કરી કાયદામાં સુધારો કર્યો છે, જેનાથી આર્મી ચીફ ફિલ્ડ માર્શલ અસીમ મુનીરને દેશના પ્રથમ સંરક્ષણ દળના વડા તરીકે નિયુક્ત કરવાનો માર્ગ મોકળો થયો છે. રાષ્ટ્રપતિ આસિફ અલી ઝરદારીએ વિવાદાસ્પદ ૨૭મા બંધારણીય સુધારાને મંજૂરી આપી છે. વડાપ્રધાન કાર્યાલય દ્વારા જાહેર કરાયેલા એક નિવેદનમાં કહેવામાં આવ્યું છે કે, લશ્કરી કાયદામાં ફેરફારોનો હેતુ સશષ દળોના કાયદાઓને નવીનતમ બંધારણીય સુધારા સાથે સુસંગત બનાવવાનો છે.
રક્ષામંત્રી ખ્વાજા આસિફે આર્મી એક્ટમાં સુધારો કરતું બિલ રજૂ કર્યા બાદ રાષ્ટ્રીય સભાને સંબોધતા, કાયદા પ્રધાન આઝમ નઝીર તરારે કહ્યું કે, આ ફેરફારો નવા કાયદો નથી, પરંતુ હાલના કાયદાઓમાં સુધારા છે. તેમણે કહ્યું કે, આર્મી એક્ટમાં ફેરફાર એ છે કે, વર્તમાન ચીફ ઓફ આર્મી સ્ટાફ પણ ચીફ ઓફ ડિફેન્સ ફોર્સ (CDF) હશે. CDFનો કાર્યકાળ તેમની નિમણૂકની તારીખથી પાંચ વર્ષનો રહેશે. નૌકાદળ અને વાયુસેના કાયદામાંથી કેટલીક જોગવાઈઓ દૂર કરવામાં આવી છે, જ્યારે અન્ય ઉમેરવામાં આવી છે.
આ સુધારા હેઠળ, પાકિસ્તાનમાં રાષ્ટ્રીય વ્યૂહાત્મક કમાન્ડ (NSC) ની સ્થાપના કરવામાં આવશે. આ કમાન્ડ પાકિસ્તાનના પરમાણુ શષો અને મિસાઇલ સિસ્ટમ્સની દેખરેખ અને નિયંત્રણ કરશે. આ અગાઉ, શાહબાઝ શરીફના નેતૃત્વ હેઠળ નેશનલ કમાન્ડ ઓથોરિટી (NCA) હતી, પરંતુ આ સત્તા હવે NSC ને ટ્રાન્સફર કરવામાં આવશે. જ્યારે NSC કમાન્ડરની નિમણૂક વડા પ્રધાનની મંજૂરીથી કરવામાં આવશે, તે CDF ની ભલામણ પર જ કરશે.
પાકિસ્તાનના રાષ્ટ્રપતિ આસિફ અલી ઝરદારીએ સંસદના બંને ગૃહો દ્વારા પસાર કરાયેલ ૨૭મા બંધારણીય સુધારા બિલ પર હસ્તાક્ષર કર્યા છે. રાષ્ટ્રપતિની સંમતિ સાથે, ૨૭મો બંધારણીય સુધારો બિલ હવે બંધારણનો ભાગ બની ગયો છે. સેનેટે પસાર કર્યું વિરોધ પક્ષોના જોરદાર વિરોધ વચ્ચે બીજી વખત વિવાદાસ્પદ ૨૭મો બંધારણીય સુધારો બિલ પસાર થયું છે. આ અગાઉ, રાષ્ટ્રીય સભાએ બે તૃતીયાંશ બહુમતી સાથે ૨૭મો બંધારણીય સુધારો પસાર કર્યો હતો. કુલ ૨૩૪ સભ્યોએ ચાર તરફેણમાં અને ચાર વિરુદ્ધ મતદાન કર્યું હતું, જ્યારે વિપક્ષે કાર્યવાહીનો બહિષ્કાર કર્યો હતો.
આ સુધારા બાદ, રાષ્ટ્રપતિ વડા પ્રધાનની સલાહ પર આર્મી ચીફ અને ચીફ ઓફ ડિફેન્સ સ્ટાફની નિમણૂક કરશે. એક વ્યાપક ચર્ચાસ્પદ પ્રસ્તાવ એ હતો કે, જોઈન્ટ ચીફસ ઓફ સ્ટાફ કમિટીના ચેરમેનનું પદ ૨૭ નવેમ્બર, ૨૦૨૫ ના રોજ નાબૂદ કરવામાં આવશે. સુધારા હેઠળ, પાકિસ્તાનના વર્તમાન મુખ્ય ન્યાયાધીશ તેમના કાર્યકાળના અંત સુધી આ પદ સંભાળશે. તે પછી, આ પદ સુપ્રીમ કોર્ટ અથવા ફેડરલ બંધારણીય અદાલતના સૌથી વરિષ્ઠ ન્યાયાધીશને સોંપવામાં આવશે.
પાકિસ્તાનના સૌથી વિવાદાસ્પદ સુધારા બિલ પસાર થયા પછી, સુપ્રીમ કોર્ટના બે ન્યાયાધીશોએ વિરોધમાં રાજીનામું આપ્યું છે. રાષ્ટ્રપતિ આસિફ અલી ઝરદારીએ ૨૭મો બંધારણીય સુધારા પર હસ્તાક્ષર કર્યા પછી વરિષ્ઠ ન્યાયાધીશો મન્સૂર અલી શાહ અને અતહર મિનલ્લાહે રાજીનામું આપ્યું છે. ધ એક્સપ્રેસ ટ્રિબ્યુન અનુસાર, ૧૩ પાનાના રાજીનામામાં, મન્સૂર અલી શાહે જણાવ્યું હતું કે, ૨૭મો બંધારણીય સુધારો પાકિસ્તાનના બંધારણ પર ગંભીર હુમલો હતો. તેમણે કહ્યું હતું કે, ન્યાયતંત્ર વિભાજિત થઈ ગયું છે, જેનાથી દેશ દાયકાઓ પાછળ ધકેલાઈ ગયો છે.
તેમણે કહ્યું કે, ૨૭મા બંધારણીય સુધારાએ પાકિસ્તાનની સુપ્રીમ કોર્ટને વિભાજીત કરી દીધી છે. તેણે ન્યાયતંત્રને સરકારી નિયંત્રણ હેઠળ લાવી દીધું છે. આ સુધારો પાકિસ્તાનના બંધારણીય લોકશાહીની ભાવના માટે ગંભીર ફટકો છે.(૩૮.૧૬)
(9:41 AM IST)
છેલ્લા 8 દિવસમાં સૌથી લોકપ્રિય 
