રાંચી, ઝારખંડ: ઝારખંડ હાઈકોર્ટની રજત જયંતિ (૨૫મી વર્ષગાંઠ) ની ભવ્ય ઉજવણી આજે રાંચી ખાતે કરવામાં આવી, જેમાં દેશના આગામી મુખ્ય ન્યાયાધીશ, ન્યાયાધીશ સૂર્યકાંત મુખ્ય અતિથિ તરીકે ઉપસ્થિત રહ્યા હતા. તેમણે પોતાના સંબોધનમાં ભારપૂર્વક જણાવ્યું કે, ન્યાયતંત્રનો હેતુ ફક્ત વિવાદોનું નિરાકરણ કરવાનો નથી, પરંતુ નબળા અને વંચિતોનું રક્ષણ કરવાનો પણ છે.

ન્યાયાધીશ સૂર્યકાન્તે કહ્યું કે, "ન્યાય બધા માટે છે, આ બંધારણનો મૂળભૂત સંદેશ છે. સમાનતા અને પારદર્શિતા ન્યાયિક વ્યવસ્થાની આવશ્યક શરતો છે, અને ન્યાય બધા માટે સુલભ હોવો જોઈએ." તેમણે ભારતીય ન્યાયિક પ્રણાલીમાં હાઈકોર્ટની ભૂમિકાને સુપ્રીમ કોર્ટ અને જિલ્લા અદાલતો વચ્ચેના સેતુ તરીકે ગણાવી હતી. સમારંભની શરૂઆતમાં, તેમણે મહાન આદિવાસી નેતા અને સ્વતંત્રતા સેનાની ભગવાન બિરસા મુંડાને તેમની ૧૫૦મી જન્મજયંતિ પર શ્રદ્ધાંજલિ અર્પણ કરી હતી.

આ પ્રસંગે વિશેષ અતિથિ તરીકે હાજર રહેલા કેન્દ્રીય કાયદા અને ન્યાય રાજ્યમંત્રી (સ્વતંત્ર હવાલો) અર્જુન રામ મેઘવાલએ ઝારખંડ હાઈકોર્ટની પ્રશંસા કરી અને કહ્યું કે આર્ટિફિશિયલ ઈન્ટેલિજન્સ (AI) અને માહિતી ટેકનોલોજીના યુગમાં ન્યાયતંત્રે પણ ટેકનોલોજીકલ ફેરફારોને સ્વીકારવા જોઈએ. મેઘવાલે વકીલોની માંગણી પર રાંચીમાં કેન્દ્રીય વહીવટી ટ્રિબ્યુનલની બેન્ચ સ્થાપિત કરવા પર વિચારણા કરવાની ખાતરી આપી હતી.

આ સમારોહમાં ન્યાયાધીશ સૂર્યકાન્તે ઝારખંડ જિલ્લા ન્યાયતંત્રની મોબાઇલ એપ્લિકેશન લોન્ચ કરી અને હાઈકોર્ટનું સંભારણું "પ્રગતિ" બહાર પાડ્યું હતું.