ઇસ્લામાબાદ:પરમાણુ શક્તિ અને વિશ્વની ચોથી સૌથી મોટી સૈન્ય શક્તિ ધરાવતા ભારતની સંરક્ષણ તૈયારીઓથી પાકિસ્તાન ગંભીર વ્યૂહાત્મક ફેરફારો કરવા મજબૂર બન્યું હોવાનું ભૂરાજકીય અને સંરક્ષણ નિષ્ણાતો માની રહ્યા છે. ખાસ કરીને ઓપરેશન સિંદૂરમાં ભારતની મોટી જીત અને પાકિસ્તાનના લશ્કરી માળખાને થયેલા નોંધપાત્ર નુકસાન બાદ, પાકિસ્તાની સંસદ દ્વારા તાજેતરમાં પસાર કરાયેલ ૨૭મો બંધારણીય સુધારો ભારતના લશ્કરી સુધારાઓનું સીધું પ્રતિબિંબ હોવાનું માનવામાં આવે છે.

નિષ્ણાતોના મતે, પાકિસ્તાન દ્વારા ચીફ ઓફ ડિફેન્સ ફોર્સિસ (CDF) મોડેલ અને ત્રિ-સેવા નિયંત્રણ પર વિચારણા ભારતના ચીફ ઓફ ડિફેન્સ સ્ટાફ (CDS) અને જોઈન્ટ થિયેટર કમાન્ડના માળખાથી પ્રેરિત છે. સંરક્ષણ નિષ્ણાતો દલીલ કરે છે કે ભારતનું CDS મોડેલ માત્ર વહીવટી સુધારો નહોતો, પરંતુ એક એવી વ્યૂહરચના હતી જેણે ભારતીય સેનાના આયોજન અને સંકલનને મજબૂત બનાવ્યું, જેને પાકિસ્તાન 'એનફિલ્ડ અસર' તરીકે જુએ છે – એટલે કે જો હરીફ એકીકૃત કમાન્ડ તરફ આગળ વધી રહ્યો છે, તો આપણે પણ તે જ કરવું જોઈએ.

આ સુધારા હેઠળ, આર્મી ચીફ અસીમ મુનીર હવે ચીફ ઓફ ડિફેન્સ ફોર્સિસ (CDF) બનશે. આ પગલંિ સેના, નૌકાદળ અને એરફોર્સને વધુ કેન્દ્રિય માળખામાં લાવીને રાષ્ટ્રીય સ્તરે ઝડપી નિર્ણય લેવા સક્ષમ બનાવશે. પાકિસ્તાન વારંવાર ડર વ્યક્ત કરે છે કે ભારતનું વધુ સંગઠિત થિયેટર કમાન્ડ માળખું સરહદી વિસ્તારોમાં તેના વ્યૂહાત્મક દબાણને વધુ તીવ્ર બનાવશે. નિષ્ણાતો ૨૭મા સુધારાને દક્ષિણ એશિયામાં સત્તા ગતિશીલતાના સમાંતર તરીકે જુએ છે, જ્યાં પાકિસ્તાન સ્પર્ધામાં પાછળ ન રહી જાય તે માટે તેના સુરક્ષા માળખાને આધુનિક, કેન્દ્રિત અને તકનીકી રીતે મજબૂત બનાવવાનો પ્રયાસ કરી રહ્યું છે.