નવી દિલ્હી: દિલ્હીના લાલ કિલ્લા મેટ્રો સ્ટેશન નજીક થયેલા ભયાનક કાર બોમ્બ વિસ્ફોટ બાદ દિલ્હી મેટ્રો રેલ કોર્પોરેશન (DMRC) દ્વારા લેવાયેલા કડક સુરક્ષા પગલાં વચ્ચે, મેટ્રો સ્ટેશન ફરી એકવાર મુસાફરો માટે સંપૂર્ણ રીતે કાર્યરત થઈ ગયું છે. DMRC એ શનિવારે જાહેરાત કરી કે વિસ્ફોટના કારણે અસ્થાયી રૂપે બંધ કરાયેલા લાલ કિલ્લા મેટ્રો સ્ટેશનના ગેટ નંબર ૨ અને ૩ હવે મુસાફરોની અવરજવર માટે ખુલ્લા મૂકવામાં આવ્યા છે.

 DMRC એ સોશિયલ મીડિયા પ્લેટફોર્મ 'X' પર આ અંગેની માહિતી આપી હતી. ઉલ્લેખનીય છે કે, ગયા સોમવારે વાયોલેટ લાઇન પર આવેલા લાલ કિલ્લા મેટ્રો સ્ટેશનના ગેટ નંબર ૧ ની બહાર એક કારમાં શક્તિશાળી વિસ્ફોટ થયો હતો, જેના કારણે દસ લોકો માર્યા ગયા હતા અને મેટ્રો સ્ટેશનના પ્રવેશ દ્વાર પરનો કાચ પણ તૂટી ગયો હતો. આ ઘટના બાદ સાવચેતીના ભાગરૂપે મેટ્રો સ્ટેશન બંધ કરાયું હતું.

 વિસ્ફોટ બાદ દિલ્હી પોલીસ અને સુરક્ષા એજન્સીઓએ સમગ્ર વિસ્તારમાં દેખરેખ વધારી દીધી છે. તમામ મુખ્ય રસ્તાઓ, બજારો અને મેટ્રો કોરિડોર પર સીસીટીવી કેમેરા દ્વારા વાસ્તવિક સમયમાં નજર રાખવામાં આવી રહી છે. પોલીસે નાગરિકોને અફવાઓ પર ધ્યાન ન આપવા અને ગેરમાર્ગે દોરનારી માહિતી ફેલાવતા લોકો સામે કડક કાનૂની કાર્યવાહીની ચેતવણી આપી છે.