પટણા, બિહાર: બિહાર વિધાનસભા ચૂંટણીમાં રાષ્ટ્રીય જનતા દળ (RJD) અને મહાગઠબંધનની કારમી હાર પછી, પક્ષની અંદરનો કૌટુંબિક અને રાજકીય વિવાદ હવે જાહેરમાં ફાટી નીકળ્યો છે. સોમવારે, આરજેડી વિધાનસભા પક્ષની બેઠક સમાપ્ત થયા બાદ, પટણામાં રાબડી દેવીના સત્તાવાર નિવાસસ્થાનની બહાર લાલુ પ્રસાદ યાદવના સમર્થકોએ તેજસ્વી યાદવના અંગત સલાહકાર અને આરજેડી સાંસદ સંજય યાદવ વિરુદ્ધ ભારે હંગામો મચાવ્યો હતો.

આરજેડી કાર્યકરોએ સંજય યાદવ પર મહાગઠબંધનની શરમજનક હાર, ટિકિટ વિતરણમાં ગેરરીતિ અને પક્ષના આંતરિક પતનની જવાબદારીનો આરોપ મૂક્યો હતો.

રોહિણી-તેજસ્વી ઝઘડો બન્યો ટ્રિગર: આ વિરોધનું તાત્કાલિક કારણ બે દિવસ પહેલા રાબડી દેવીના નિવાસસ્થાને બનેલી એક ઘટના છે. પક્ષના સૂત્રો અનુસાર, લાલુ યાદવની પુત્રી રોહિણી આચાર્ય અને પુત્ર તેજસ્વી યાદવ વચ્ચે સંજય યાદવને લઈને મોટો ઝઘડો થયો હતો. રોહિણીએ બાદમાં જાહેર કર્યું હતું કે સંજય યાદવનું નામ લેવા બદલ તેમની સાથે ગેરવર્તણૂક કરવામાં આવી હતી અને 'ચપ્પલથી માર મારવાની ધમકી' આપવામાં આવી હતી.

લાલુ સમર્થક નેતાઓનો આક્ષેપ છે કે સંજય યાદવે પક્ષ પર કબજો કરી લીધો છે અને તેજસ્વીને મળવા માટે પણ તેમની મંજૂરી જરૂરી છે. ચૂંટણી દરમિયાન પણ, ઘણા નેતાઓએ સંજય યાદવ પર પૈસા ન ચૂકવવાને કારણે ટિકિટ ન આપવાનો આરોપ લગાવ્યો હતો.

RJDનું કારમું પ્રદર્શન: બિહાર ચૂંટણીના પરિણામોએ RJD ને ઊંડો આઘાત આપ્યો છે. 2020 માં 75 બેઠકો જીતીને સૌથી મોટી પાર્ટી બનેલી RJD આ ચૂંટણીમાં માત્ર 25 બેઠકો પર સમેટાઈ ગઈ. તેજસ્વી યાદવ પોતે રાઘોપુરમાં માત્ર સાંકડી જીત મેળવી શક્યા હતા, અને મહાગઠબંધનની બેઠકો 110 થી ઘટીને માત્ર 35 થઈ ગઈ. આ કારમી હાર બાદ સંજય યાદવને પક્ષમાં ચાલી રહેલા આક્રોશનો મુખ્ય લક્ષ્ય બનાવવામાં આવ્યો છે.