વિશાખાપટ્ટનમ, ૧૮ નવેમ્બર ૨૦૨૫: આંધ્રપ્રદેશમાં સુરક્ષા દળોને આજે નક્સલવાદ વિરુદ્ધની લડાઈમાં એક મોટી સફળતા મળી છે. આંધ્રપ્રદેશના અલ્લુરી સીતારામ રાજુ જિલ્લાના મારેડુમિલી જંગલ વિસ્તારમાં સુરક્ષા દળો અને માઓવાદીઓ વચ્ચે થયેલા એન્કાઉન્ટરમાં કુલ છ માઓવાદીઓ માર્યા ગયા છે. માર્યા ગયેલાઓમાં કુખ્યાત વરિષ્ઠ માઓવાદી નેતા અને કેન્દ્રીય સમિતિના સભ્ય માધવી હિડમા તેમજ તેમની પત્ની રાજે અને કેટલાક નજીકના અનુયાયીઓનો સમાવેશ થાય છે.
 
આંધ્રપ્રદેશના ડીજીપી હરીશ કુમાર ગુપ્તાએ માહિતી આપી હતી કે આ ઓપરેશન આજે સવારે ૬ વાગ્યાથી શરૂ કરવામાં આવ્યું હતું. પોલીસને આંધ્રપ્રદેશ, છત્તીસગઢ અને ઓડિશાના સરહદી વિસ્તારોમાં માઓવાદી ચળવળ અંગે ગુપ્ત માહિતી મળી હતી, જેના આધારે આ વિસ્તૃત કોમ્બિંગ ઓપરેશન હાથ ધરવામાં આવ્યું હતું. એન્કાઉન્ટર બાદ પણ સુરક્ષા દળો આ પ્રદેશ પર સઘન નજર રાખી રહ્યા છે, અને આ વિસ્તારમાં વધુ કોઈ માઓવાદીઓ છુપાયેલા છે કે કેમ તે જાણવા માટે સર્ચ ઓપરેશન ચાલુ છે. માધવી હિડમા જેવા વરિષ્ઠ નેતાનું મૃત્યુ એ પ્રદેશમાં નક્સલવાદીઓની કમર તોડનારી કાર્યવાહી માનવામાં આવે છે.