વોશિંગ્ટન ડીસી: યુએસ પ્રમુખ ડોનાલ્ડ ટ્રમ્પે યુક્રેન-રશિયા યુદ્ધનો તાત્કાલિક અંત લાવવા માટે 28 મુદ્દાઓની એક નવી 'શાંતિ યોજના' રજૂ કરી છે, જેનાથી આંતરરાષ્ટ્રીય રાજકારણમાં ખળભળાટ મચી ગયો છે. ટ્રમ્પે સ્પષ્ટ સંકેત આપ્યો છે કે યુક્રેનના રાષ્ટ્રપતિ વોલોડીમીર ઝેલેન્સકી પાસે આ યોજના સ્વીકારવા સિવાય કોઈ વિકલ્પ નથી. આ યોજના રશિયા તરફ પક્ષપાતી લાગી રહી છે, અને યુક્રેનની સંમતિ વિના યુદ્ધ સમાપ્ત કરવાના ટ્રમ્પના અગાઉના પ્રયાસોને તે આગળ ધપાવે છે.

ઓવલ ઓફિસમાં મીડિયા સાથે વાત કરતી વખતે ટ્રમ્પે આત્મવિશ્વાસ વ્યક્ત કર્યો, "અમારું માનવંા છે કે અમારી પાસે શાંતિ સ્થાપિત કરવાનો માર્ગ છે. ઝેલેન્સકીએ તેને સ્વીકારવું જ જોઈએ."
ટ્રમ્પની યોજનાના મુખ્ય મુદ્દાઓ અને યુક્રેન પર દબાણ: ટ્રમ્પની નવી યોજનાનું કેન્દ્ર યુક્રેન પર કેટલાંક આકરા પગલાં લેવા માટે દબાણ લાવવાનું છે:
પ્રદેશનું આત્મસમર્પણ: યુક્રેન તેના પૂર્વીય ડોનબાસ ક્ષેત્રનો અમુક ભાગ રશિયાને સોંપી દે.
સૈન્ય ઘટાડો: યુક્રેન તેના સૈન્યના કદમાં ભારે ઘટાડો કરે.
નાટો જોડાણ: યુક્રેન ક્યારેય નાટો લશ્કરી જોડાણમાં સામેલ નહીં થાય તેની યુરોપને ખાતરી આપે.
ટ્રમ્પે અપેક્ષા વ્યક્ત કરી છે કે ઝેલેન્સકી આગામી ગુરુવાર સુધીમાં આ નવી યોજનાનો જવાબ આપશે.
ઝેલેન્સકીની મૌન ચિંતા: યોજના જાહેર થયા બાદ ઝેલેન્સકીએ ટ્રમ્પ સાથે સીધી વાતચીત કરી નથી, જોકે તેમણે આગામી દિવસોમાં વાતચીતની અપેક્ષા રાખી છે. યુક્રેનિયન રાષ્ટ્રપતિનું નિવેદન ટ્રમ્પના દબાણ વચ્ચેની તેમની દુવિધા દર્શાવે છે.
શુક્રવારે પોતાના વીડિયો સંબોધનમાં ઝેલેન્સકીએ કહ્યું હતું કે યુક્રેન હવે તેના ઇતિહાસના સૌથી મુશ્કેલ સમયનો સામનો કરી રહ્યું છે. તેમણે કહ્યું કે યુક્રેને "કાં તો તેનું ગૌરવ ગુમાવવાનું જોખમ લેવું જોઈએ અથવા મુખ્ય ભાગીદાર (યુએસ) ગુમાવવાનું જોખમ લેવું જોઈએ."
યુક્રેનની સરકાર હાલમાં ભ્રષ્ટાચાર અને યુદ્ધક્ષેત્રના પડકારોનો સામનો કરી રહી છે, અને રશિયાના ઊર્જા માળખા પરના સતત બોમ્બમારાથી આ શિયાળો વધુ મુશ્કેલ બનવાની સંભાવના છે, જે ઝેલેન્સકીને ટ્રમ્પની યોજના પર વિચાર કરવા માટે મજબૂર કરી શકે છે.