પટના: બિહાર વિધાનસભાની ચૂંટણીમાં NDA ની જંગી જીત અને પોતાની પાર્ટી લોક જનશક્તિ પાર્ટી (રામ વિલાસ) ના પ્રભાવશાળી પ્રદર્શન બાદ કેન્દ્રીય મંત્રી ચિરાગ પાસવાન અને તેમના કાકા પશુપતિ કુમાર પારસ વચ્ચેના પારિવારિક તેમજ રાજકીય તણાવ ફરી સપાટી પર આવ્યો છે.
તાજેતરમાં, રાષ્ટ્રીય લોક જનશક્તિ પાર્ટીના પ્રમુખ પશુપતિ પારસે સોશિયલ મીડિયા દ્વારા તેમના ભત્રીજા ચિરાગ પાસવાનને જીત બદલ અભિનંદન પાઠવ્યા હતા. જોકે, ચિરાગ પાસવાને પટનામાં આ અંગે પ્રતિક્રિયા આપતા પારસ પર કટાક્ષ કર્યો.
'ચાંડાલ' કહ્યો હતો, છતાં આશીર્વાદ માન્યા: પટનામાં એક પત્રકાર પરિષદ દરમિયાન મીડિયા સાથે વાત કરતા ચિરાગ પાસવાને જૂની ફરિયાદોને યાદ કરીને પારસ પર ટોણો માર્યો:
"ચાચાજીએ મને એક વાર ચાંડાલ (Chandal) કહ્યો હતો અને મારી સાથે દુર્વ્યવહાર કર્યો હતો, પરંતુ તે પછી પણ મેં તેને વડીલનો આશીર્વાદ માન્યો હતો. હવે જ્યારે તેઓ ખરેખર અભિનંદન આપી રહ્યા છે, તો આ શુભકામનાઓ ખરેખર આશીર્વાદ છે."
ચિરાગ પાસવાને તેમના કાકા પશુપતિ પારસ પર માત્ર લોક જનશક્તિ પાર્ટીને તોડવાનો જ નહીં, પણ સ્વર્ગસ્થ રામવિલાસ પાસવાન દ્વારા સ્થાપિત બિન-રાજકીય સંગઠન 'દલિત સેના' ને પણ હડપ કરવાનો ગંભીર આરોપ લગાવ્યો હતો.
સંબંધો સુધરશે કે નહીં?: પશુપતિ પારસે માત્ર NDA ને જ નહીં, પણ ચિરાગ પાસવાનને પણ અલગથી અભિનંદન આપીને સમાધાનનો સંકેત આપ્યો હતો. પત્રકારોએ જ્યારે ચિરાગને તેમના કાકા વિશે પૂછ્યું, ત્યારે ચિરાગે નમ્રતાપૂર્વક જવાબ આપ્યો, "તેઓ મોટા છે, અને મને તેમના આશીર્વાદ છે."
હવે બિહારના રાજકીય વર્તુળોમાં પ્રશ્ન એ ચર્ચાઈ રહ્યો છે કે, પાસવાન પરિવારના આ બે મોટા નેતાઓ પોતાની ભૂતકાળની ફરિયાદો ભૂલીને ફરી એક થશે કે આ તણાવ ચાલુ રહેશે?