અયોધ્યા : આજે, મંગળવારના રોજ વડાપ્રધાન નરેન્દ્ર મોદી સહિત દેશના અગ્રણી રાજકીય અને ધાર્મિક નેતાઓની હાજરીમાં શ્રી રામ મંદિરમાં 'ધર્મ ધ્વજ' સ્થાપના સમારોહ યોજાવા જઈ રહ્યો છે. આ ભવ્ય અને સંવેદનશીલ પ્રસંગને ધ્યાનમાં રાખીને ઉત્તર પ્રદેશના મુખ્યમંત્રી યોગી આદિત્યનાથના નિર્દેશ હેઠળ અયોધ્યાની સુરક્ષા વ્યવસ્થાને સર્વોચ્ચ પ્રાથમિકતા આપીને તેને અભેદ્ય કિલ્લામાં પરિવર્તિત કરવામાં આવી છે.
સુરક્ષા યોજના હેઠળ, લગભગ 7,000 કર્મચારીઓનો જંગી કાફલો તૈનાત કરવામાં આવ્યો છે, જેમાં વિવિધ સ્તરના પોલીસ અધિકારીઓ અને વિશેષ સુરક્ષા એકમોનો સમાવેશ થાય છે. આ વ્યૂહાત્મક સુરક્ષામાં ૧૪ SP, ૩૦ ASP, ૯૦ DySP સહિત કુલ ૬,૯૭૦ જવાનોનો સમાવેશ થાય છે.
અત્યાધુનિક ટેકનોલોજી અને વિશેષ ટુકડીઓ: અયોધ્યાની સુરક્ષા માટે માત્ર માનવબળ જ નહીં, પણ અત્યાધુનિક ટેકનિકલ સાધનોનો પણ ઉપયોગ કરવામાં આવ્યો છે:
એન્ટી-ડ્રોન સિસ્ટમ: હવાઈ સુરક્ષા સુનિશ્ચિત કરવા માટે એક ખાસ એન્ટી-ડ્રોન યુનિટ તૈનાત કરાયું છે, જે કોઈપણ અનિચ્છનીય ડ્રોન સર્વેલન્સને નિષ્ફળ બનાવશે.
સ્નાઇપર અને કમાન્ડો: વિશેષ સુરક્ષા માટે ATS કમાન્ડો અને NSG સ્નાઈપર્સની બે-બે ટીમો સંવેદનશીલ સ્થળોએ તૈનાત કરવામાં આવી છે.
ટેકનિકલ સર્વેલન્સ: સુરક્ષા વ્યવસ્થાને મજબૂત કરવા માટે લગભગ ૯૦ ટેકનિકલ કર્મચારીઓ, ચાર સાયબર કમાન્ડો અને બોમ્બ ડિટેક્શન સ્ક્વોડ (BDS)ની ટીમો તૈનાત છે. CCTV મોડ્યુલ્સ, હેન્ડહેલ્ડ મેટલ ડિટેક્ટર અને બેગેજ એક્સ-રે સ્કેનર પણ પૂરા પાડવામાં આવ્યા છે.
ટ્રાફિક વ્યવસ્થાપન માટે પણ ૧૬ ટ્રાફિક નિરીક્ષકો અને ૯૫૦ થી વધુ કર્મચારીઓની ટીમ તૈનાત કરવામાં આવી છે, જે VIP રૂટ ડાયવર્ઝન અને પાર્કિંગ વ્યવસ્થાપન સંભાળશે. આ ભવ્ય સમારોહમાં કોઈ પણ પ્રકારની અવ્યવસ્થા ન સર્જાય તે માટે વરિષ્ઠ અધિકારીઓથી લઈને ફિલ્ડ ટીમો સુધીનું સંકલન સુનિશ્ચિત કરવામાં આવ્યું છે.