નવી દિલ્હી : વિશ્વના સૌથી કુખ્યાત નામોમાંથી એક, 'એડોલ્ફ હિટલર', આફ્રિકન દેશ નામીબિયામાં ફરી એકવાર રાજકીય ચર્ચાનો વિષય બન્યો છે. અહીંના જાણીતા રાજકારણી એડોલ્ફ હિટલર ઉનોના 26 નવેમ્બરના રોજ યોજાનારી ચૂંટણીમાં ચોથી ટર્મ માટે જીત મેળવવા તૈયાર છે. તેમનું નામ દુનિયાને બીજા વિશ્વયુદ્ધની યાદ અપાવે છે, પરંતુ તેઓ પોતે વસાહતી શાસન અને રંગભેદ સામે લડનારા લોકસેવક તરીકે જાણીતા છે.
'હિટલર' નામની ઉત્પત્તિનું રહસ્ય: 59 વર્ષીય એડોલ્ફ હિટલર ઉનોનાએ તેમના અસામાન્ય નામ અંગે ઘણી વખત સ્પષ્ટતા કરી છે.
પિતાની ભૂલ: ઉનોનાના કહેવા મુજબ, તેમના પિતાએ કદાચ જર્મન નેતાના નામ પરથી તેમનું નામ રાખ્યું હશે, પરંતુ તેમને વાસ્તવિક હિટલરના ક્રૂર કાર્યો વિશે જાણ ન હતી. તેમના માટે તે માત્ર એક સામાન્ય નામ હતું.
સ્પષ્ટતા: 2020 માં જંગી જીત મેળવ્યા પછી પણ, ઉનોનાએ સ્પષ્ટ કર્યું હતું કે, "હિટલર નામ આપવાનો અર્થ એ નથી કે હું સરમુખત્યાર છું. મારે નાઝી વિચારધારા સાથે કોઈ લેવાદેવા નથી. હું ફક્ત મારા જિલ્લા ઓમપુંડજાનો વિકાસ કરવા માંગુ છું."
મતદારોમાં પ્રચંડ લોકપ્રિયતા: SWAPO પાર્ટીના સભ્ય એડોલ્ફ હિટલર ઉનોના તેમના મતવિસ્તાર ઓમપુંડજામાં ખૂબ જ લોકપ્રિય છે. 2020 ની ચૂંટણીમાં તેમણે પોતાના પ્રતિસ્પર્ધીને ભારે અંતરથી હરાવ્યા હતા, જે તેમની જાહેર સેવા પ્રત્યેની પ્રતિબદ્ધતા દર્શાવે છે.
નામીબિયા 1884 થી 1915 સુધી જર્મન વસાહત હતું, તેથી ત્યાં જર્મન નામોની હાજરી સામાન્ય છે. જોકે, ઉનોનાએ પોતાનું નામ બદલવાનો ઇનકાર કર્યો છે, કારણ કે તે કહે છે કે હવે ઘણું મોડું થઈ ગયું છે. તેઓ તેમના કાર્ય દ્વારા આ નામના કલંકને ધોવા માંગે છે.