મુંબઈ: મહારાષ્ટ્રમાં સત્તાધારી ગઠબંધનમાં પડેલી તિરાડ હવે ખુલ્લેઆમ સપાટી પર આવી ગઈ છે. પાલઘરની સ્થાનિક ચૂંટણીના પ્રચારમાં શરૂ થયેલું વાકયુદ્ધ હવે 'રામ અને રાવણ'ના ઉદાહરણો સુધી પહોંચી ગયું છે. એકનાથ શિંદેએ ભાજપનું નામ લીધા વિના તેમને 'અહંકારી રાવણ' ગણાવ્યા હતા, જેના જવાબમાં દેવેન્દ્ર ફડણવીસે આક્રમક તેવર બતાવતા કહ્યું છે કે, 'અમે લંકામાં રહેનારા નથી પણ રામના અનુયાયી છીએ અને લંકા દહન કરતા અમને આવડે છે.' અમિત શાહની દરમિયાનગીરી છતાં બંને પક્ષો વચ્ચેનો અવિશ્વાસ ઘટવાનું નામ નથી લઈ રહ્યો.

મહારાષ્ટ્રના રાજકારણમાં સત્તાધારી મહાયુતિ ગઠબંધનના બે મુખ્ય પક્ષો, શિવસેના (શિંદે જૂથ) અને ભાજપ વચ્ચેનો આંતરિક ડખો હવે જાહેરસભાઓમાં આક્ષેપ-પ્રતિઆક્ષેપમાં ફેરવાઈ ગયો છે. આ વિવાદનું મૂળ પાલઘર જિલ્લામાં નગર પંચાયતની ચૂંટણી છે, જ્યાંથી શરૂ થયેલી ચિનગારીએ હવે રાજ્યવ્યાપી વિવાદનું સ્વરૂપ ધારણ કરી લીધું છે.

પાલઘરનો વિવાદ અને શિંદેનો કટાક્ષ

સમગ્ર મામલાની શરૂઆત ત્યારે થઈ જ્યારે પાલઘરમાં ભાજપે શિવસેનાના કેટલાક કોર્પોરેટરોને પોતાના પક્ષમાં સામેલ કરી લીધા. આ પક્ષપલટાથી નારાજ થયેલા મુખ્યમંત્રી એકનાથ શિંદેએ જાહેરસભામાં ભાજપનું નામ લીધા વિના આકરા પ્રહારો કર્યા હતા. શિંદેએ કટાક્ષ કરતા કહ્યું હતું કે, "રાવણ પણ ખૂબ અહંકારી હતો, પણ અંતે તેની સોનાની લંકા પણ બળીને ખાખ થઈ ગઈ હતી." તેમણે મતદારોને અપીલ કરી હતી કે આવનારી 2 ડિસેમ્બરે (ચૂંટણીના દિવસે) તમારે પણ આવું જ કરવાનું છે. શિંદેનો ઈશારો સ્પષ્ટ હતો કે ગઠબંધન ધર્મના પાલનમાં ભાજપ 'અહંકાર' બતાવી રહ્યું છે અને પાયાના સ્તરે શિવસેનાના સંગઠનને તોડવાનું કામ કરી રહ્યું છે.

ફડણવીસનો પલટવાર: 'અમે રામ મંદિર પર ધજા લહેરાવી છે'

સામાન્ય રીતે વિવાદિત નિવેદનોથી દૂર રહેતા નાયબ મુખ્યમંત્રી દેવેન્દ્ર ફડણવીસે આ વખતે શિંદેના નિવેદન પર મૌન તોડ્યું છે અને બમણા જોરથી વળતો પ્રહાર કર્યો છે. બુધવારે ફડણવીસે કહ્યું હતું કે, "જે લોકો અમારા વિશે ગમે તે બોલે છે, તેમની અવગણના કરો. તેઓ કહી શકે છે કે અમારી લંકા બાળશે, પણ અમે લંકામાં નથી રહેતા. અમે ભગવાન રામના અનુયાયી છીએ, રાવણના નહીં."

ફડણવીસે વધુમાં ઉમેર્યું હતું કે, "અમે તો 'જય શ્રી રામ' બોલનારા લોકો છીએ. અમે તો રામ મંદિર પર ધર્મધ્વજા લહેરાવી છે. જે ભગવાન રામની પૂજા કરે છે, તે લંકા બાળવાનું કામ જાણે છે." ફડણવીસના આ નિવેદને સ્પષ્ટ કરી દીધું છે કે ભાજપ હવે શિવસેનાના દબાણમાં આવવા તૈયાર નથી અને 'હિન્દુત્વ'ના મુદ્દે પણ તેઓ પીછેહઠ નહીં કરે.

દિલ્હી દરબારમાં દોડધામ અને અવિશ્વાસ

બંને પક્ષો વચ્ચેનો આ ડખો એટલો વધી ગયો હતો કે શિવસેનાના મંત્રીઓએ દેવેન્દ્ર ફડણવીસની કેબિનેટ બેઠકનો પણ બહિષ્કાર કર્યો હતો. મામલો થાળે પાડવા માટે મુખ્યમંત્રી એકનાથ શિંદે તાત્કાલિક દિલ્હી દોડી ગયા હતા અને કેન્દ્રીય ગૃહમંત્રી અમિત શાહ સાથે મુલાકાત કરી હતી. સૂત્રોના જણાવ્યા અનુસાર, તેમને ભરોસો આપવામાં આવ્યો હતો કે જો શિવસેના ભાજપના નેતાઓને નહીં તોડે તો ભાજપ પણ આવું નહીં કરે. જોકે, ચૂંટણી પ્રચારમાં નેતાઓ કાર્યકરોને આ વાતો દિલ પર ન લેવાની સલાહ આપી રહ્યા છે, પરંતુ ગઠબંધનની અંદર સત્તા સંઘર્ષ અને એકબીજા પ્રત્યેનો અવિશ્વાસ હવે છુપાવ્યો છુપાતો નથી. આ સ્થિતિ મહારાષ્ટ્રના રાજકારણમાં નવા સમીકરણો સર્જે તેવી શક્યતા છે.