નવી દિલ્હી:ચૈતન્યાનંદ સરસ્વતી જાતીય શોષણ કેસમાં આજે દિલ્હીની પટિયાલા હાઉસ કોર્ટ તરફથી ત્રણ મહિલા આરોપીઓને મોટી રાહત મળી છે. જુડિશિયલ મેજિસ્ટ્રેટ ફર્સ્ટ ક્લાસ અનિમેષ કુમારની કોર્ટે આ ત્રણેય મહિલાઓને ₹૨૦,૦૦૦ના જામીન બોન્ડ ભરવાના આદેશ સાથે જામીન મંજૂર કર્યા છે.
વસંત કુંજ ઉત્તર પોલીસ સ્ટેશનમાં નોંધાયેલો આ કેસ, ટ્રસ્ટ દ્વારા સંચાલિત સંસ્થાની વિદ્યાર્થીઓની ફરિયાદ પર આધારિત છે, જેમાં સરસ્વતી દ્વારા જાતીય શોષણનો આરોપ મૂકવામાં આવ્યો હતો.
૧,૦૭૭ પાનાની ચાર્જશીટ દાખલ: કોર્ટે આ ત્રણ મહિલા આરોપીઓને જામીન આપ્યા છે કારણ કે તેમને ધરપકડ કર્યા વિના ચાર્જશીટમાં સામેલ કરવામાં આવ્યા હતા. ચાર્જશીટની નોંધ લીધા બાદ કોર્ટે તેમને સમન્સ પાઠવ્યા હતા.
દિલ્હી પોલીસે ૨૬ નવેમ્બરના રોજ ચૈતન્યાનંદ સરસ્વતી અને અન્ય ચાર આરોપીઓ – હરીશ કાપકોટી, ભાવના, શ્વેતા અને કાજલ – સામે ૧,૦૭૭ પાનાની વિગતવાર ચાર્જશીટ દાખલ કરી હતી. આ ચાર્જશીટમાં ૪૩ સાક્ષીઓના નિવેદનો સામેલ છે.
ચાર્જશીટમાં ભારતીય દંડ સંહિતા (IPC) ની કલમ 75(2), 79, 232, 351(3), 238(B) અને અન્ય સંબંધિત કલમો હેઠળ આરોપો મૂકવામાં આવ્યા છે. સરકારી વકીલ રાઘવ ખુરાના પાસેથી એક કલમ અંગે સ્પષ્ટતા મળ્યા બાદ ૨૭ નવેમ્બરના રોજ કોર્ટે આ ચાર્જશીટને નોંધી હતી અને ત્યારબાદ આરોપીઓને તેની નકલો પૂરી પાડવામાં આવી હતી