કોલંબો:  ચક્રવાત દિત્વાહથી સર્જાયેલી ભારે તબાહી વચ્ચે, ભારતીય વાયુસેનાએ શ્રીલંકામાં 'ઓપરેશન સાગર બંધુ' નામનું આંતરરાષ્ટ્રીય સ્તરનું રાહત અને બચાવ કાર્ય શરૂ કરીને વસુધૈવ કુટુંબકમ્'ની ભાવનાને સાર્થક કરી છે. શ્રીલંકાના કોટમાલે ક્ષેત્રમાં ભૂસ્ખલન અને પ્રતિકૂળ હવામાન પરિસ્થિતિઓમાં ફસાયેલા ૨૪ મુસાફરોને IAFના Mi-૧૭ હેલિકોપ્ટર દ્વારા એક જટિલ હાઇબ્રિડ રેસ્ક્યૂ મિશન દ્વારા સુરક્ષિત રીતે બહાર કાઢવામાં આવ્યા હતા, જેમાં IAF ના ગરુડ કમાન્ડોને પણ તૈનાત કરવામાં આવ્યા હતા.

સૌથી મહત્વની વાત એ છે કે બચાવવામાં આવેલા ૨૪ મુસાફરોમાં માત્ર ભારતીય અને શ્રીલંકન નાગરિકો જ નહીં, પરંતુ એક પાકિસ્તાની, બે બાંગ્લાદેશી અને પાંચ ઈરાની નાગરિકોનો પણ સમાવેશ થાય છે. આ તમામ વિદેશી નાગરિકોને સુરક્ષિત રીતે કોલંબો પહોંચાડવામાં આવ્યા છે. સમાંતર રીતે, ગંભીર રીતે ઘાયલ ત્રણ વ્યક્તિઓને પણ તાત્કાલિક તબીબી સહાય માટે એરલિફ્ટ કરવામાં આવ્યા હતા. રાહત કામગીરીને મજબૂત કરવા માટે શ્રીલંકન સેનાની પાંચ ટીમો સ્થળ પર હાજર હતી, અને ૪૦ શ્રીલંકન સૈનિકોને પણ IAF દ્વારા દિયાતલાવા આર્મી કેમ્પમાંથી કોટમાલે વિસ્તારમાં તૈનાત કરવામાં આવ્યા હતા.

માનવતાવાદી સહાયના ભાગરૂપે, રવિવારે સવારે ભારતીય વાયુસેનાનું C-130J વિમાન રાહત સામગ્રી લઈને કોલંબો પહોંચ્યું, જેમાં ચાર "ભીષ્મ" આરોગ્ય મૈત્રી પોર્ટેબલ હોસ્પિટલ ક્યુબ્સનો સમાવેશ થાય છે. આ વિમાન પાંચ IAFની તબીબી ટીમો અને અન્ય આવશ્યક રાહત સામગ્રી પણ લઈ ગયું હતું. આ વિમાન હવે શ્રીલંકામાં ફસાયેલા ભારતીય નાગરિકોને પરત લાવવાની કામગીરી કરશે. ભારત દ્વારા ચક્રવાત દિત્વાહ દરમિયાન શ્રીલંકાને આપવામાં આવેલી તાત્કાલિક સહાય, આપત્તિના સમયમાં ઝડપ અને કાર્યક્ષમતા સાથે માનવતા દર્શાવવાની ભારતની પ્રતિબદ્ધતાને રેખાંકિત કરે છે.

એટલું જ નહીં, ભારતીય વાયુસેનાએ ભારતમાં પણ ચક્રવાતની અસરના પ્રતિભાવમાં ઝડપથી સ્થાનિક રાહત કામગીરી શરૂ કરી છે. C-17 ગ્લોબમાસ્ટર વિમાન દ્વારા પુણે અને વડોદરાથી NDRF (નેશનલ ડિઝાસ્ટર રિસ્પોન્સ ફોર્સ) ની ટીમો અને આવશ્યક સાધનોને ચેન્નાઈ પહોંચાડવામાં આવ્યા હતા. આ ઝડપી કાર્યવાહીમાં ૩૦૦ થી વધુ NDRF કર્મચારીઓ અને આશરે ૩૫ ટન મહત્વપૂર્ણ રાહત પુરવઠો અસરગ્રસ્ત વિસ્તારોમાં તાત્કાલિક તૈનાત કરવામાં આવ્યો હતો, જે દર્શાવે છે કે IAF સ્થાનિક અને આંતરરાષ્ટ્રીય બંને મોરચે આપત્તિ વ્યવસ્થાપન માટે હંમેશા તૈયાર છે.