નવી દિલ્હી : સુપ્રીમ કોર્ટે આજે UMEED પોર્ટલ હેઠળ 'વકફ બાય યુઝર' સહિત તમામ વકફ મિલકતોની ફરજિયાત નોંધણી માટેની સમય મર્યાદા લંબાવવાની માંગણીને ફગાવી દીધી છે. જસ્ટિસ દીપાંકર દત્તા અને ઓગસ્ટિન જ્યોર્જ મસીહની બનેલી બેન્ચે સ્પષ્ટતા કરી કે અરજદારો પાસે હવે સમયમર્યાદા પહેલાં સંબંધિત ટ્રિબ્યુનલનો સંપર્ક કરવાનો વિકલ્પ ઉપલબ્ધ છે.
ઓલ ઇન્ડિયા મુસ્લિમ પર્સનલ લો બોર્ડ (AIMPLB) અને AIMIM નેતા અસદુદ્દીન ઓવૈસી સહિત અનેક પક્ષોએ તમામ વકફ મિલકતોની ફરજિયાત નોંધણી માટે છ મહિનાના સમયગાળાને લંબાવવાની માંગણી સાથે સર્વોચ્ચ અદાલતમાં અરજી કરી હતી. જોકે, બેન્ચે તમામ અરજીઓનો નિકાલ કરતા જણાવ્યું હતું કે, "અરજદારો સમક્ષ ટ્રિબ્યુનલ સમક્ષ ઉપાય ઉપલબ્ધ હોવાથી, અમે છ મહિનાના સમયગાળાની છેલ્લી તારીખ સુધીમાં ટ્રિબ્યુનલનો સંપર્ક કરવાની સ્વતંત્રતા આપીને તમામ અરજીઓનો નિકાલ કરીએ છીએ."
UMEED પોર્ટલનો ઉદ્દેશ્ય અને વિવાદ
કેન્દ્ર સરકારે 6 જૂનના રોજ યુનિફાઇડ વકફ મેનેજમેન્ટ, એમ્પાવરમેન્ટ, એફિશિયન્સી એન્ડ ડેવલપમેન્ટ (UMEED) એક્ટ સેન્ટ્રલ પોર્ટલ શરૂ કર્યું હતું. આ પોર્ટલનો આદેશ ભારતભરમાં નોંધાયેલી તમામ વકફ મિલકતોની વિગતો છ મહિનાની અંદર ફરજિયાતપણે અપલોડ કરવાનો છે, જેથી તેનું જીઓ-ટેગિંગ કરીને ડિજિટલ ઇન્વેન્ટરી બનાવી શકાય.
નોંધનીય છે કે, અગાઉ 15 સપ્ટેમ્બરના વચગાળાના આદેશમાં, સુપ્રીમ કોર્ટે વકફ (સુધારા) અધિનિયમ, 2025 ની કેટલીક મુખ્ય જોગવાઈઓ પર રોક લગાવી હતી, પરંતુ સમગ્ર કાયદા પર સ્ટે મૂકવાનો ઇનકાર કર્યો હતો. આ વિવાદમાં 'વકફ બાય યુઝર' જોગવાઈ પણ સામેલ છે, જે માલિકની ઔપચારિક ઘોષણા વિના લાંબા ગાળાના ઉપયોગના આધારે મિલકતને વકફ તરીકે ઓળખવાની પ્રથા છે.