મુંબઈ: સોશિયલ મીડિયા અને આંતરરાષ્ટ્રીય માર્કેટમાં ભારત યુએસના આદેશોથી ડરી જશે તેવી ચાલતી વાર્તાઓ વચ્ચે, ભારતે નવેમ્બર મહિનામાં રશિયા પાસેથી ક્રૂડ તેલની ખરીદીનો માસિક રેકોર્ડ બનાવી દીધો છે. ઘરેલુ રિફાઈનરીઓએ મોટા પાયે ક્રૂડનો સ્ટોક કરતા આયાતમાં મોટો ઉછાળો આવ્યો છે, જે દર્શાવે છે કે ભારત પોતાના રાષ્ટ્રીય હિતોને સર્વોચ્ચ સ્થાને રાખે છે.

નવેમ્બર મહિનામાં રશિયા પાસેથી ક્રૂડ તેલની આયાતે માસિક ધોરણે એક નવો રેકોર્ડ સ્થાપિત કર્યો છે. આ આયાતમાં ભારે વધારો જોવા મળ્યો છે, કારણ કે ભારતીય રિફાઈનરીઓએ સસ્તા દરે ઉપલબ્ધ ક્રૂડ તેલનો જથ્થો ખરીદવાની દોડ લગાવી દીધી હતી.

બિઝનેસન્યૂઝલાઈન અંગ્રેજી અખબારના  રિપોર્ટ્સ અનુસાર, નવેમ્બરમાં રશિયાથી શિપમેન્ટ લગભગ ૧.૮ મિલિયન બેરલ પ્રતિ દિવસ (બીપીડી) ના રેકોર્ડ સ્તરે પહોંચી ગયું હતું. આ તેલની ખરીદીમાં થયેલો જંગી વધારો એવા સમયે થયો છે, જ્યારે સોશિયલ મીડિયા પર અને અમુક આંતરરાષ્ટ્રીય વર્તુળોમાં એવી વાતો ચાલી રહી હતી કે અમેરિકાના પ્રતિબંધોના આદેશોના ડરથી ભારત રશિયા પાસેથી તેલની ખરીદી ઘટાડી દેશે. રેકોર્ડ આયાતના આ આંકડાઓએ આવી તમામ પાયાવિહોણી વાર્તાઓને ખોટી સાબિત કરી છે.

આયાત વધવાના મુખ્ય કારણો:

 * ભારે ડિસ્કાઉન્ટ: રશિયા-યુક્રેન યુદ્ધ બાદ પશ્ચિમી દેશોના પ્રતિબંધોને કારણે રશિયાનું ક્રૂડ તેલ આંતરરાષ્ટ્રીય બજાર કરતાં ભારે ડિસ્કાઉન્ટ પર ઉપલબ્ધ છે, જે ભારતીય રિફાઈનરીઓ માટે અત્યંત આકર્ષક રહ્યું છે.

 * પ્રતિબંધો પહેલાં સ્ટોકિંગ: નવેમ્બરની ૨૧મી તારીખની આસપાસ યુએસ દ્વારા અમુક રશિયન સંસ્થાઓ પર પ્રતિબંધોની સમયમર્યાદા (ડેડલાઈન) લાગુ થવાની હતી. તેના અનુસંધાને, ભારતીય રિફાઈનરીઓએ પ્રતિબંધો લાગુ થાય તે પહેલાં જ સસ્તા ક્રૂડનો મોટો જથ્થો ખરીદીને સ્ટોક કરવા માટે ખરીદીમાં ઝડપ લાવી દીધી હતી.

ભારત વિશ્વમાં તેલનો ત્રીજો સૌથી મોટો ઉપભોક્તા દેશ છે અને ફેબ્રુઆરી ૨૦૨૨ના યુદ્ધ બાદ રશિયા પાસેથી ક્રૂડ તેલની આયાત વધારીને રશિયાને પોતાનો સૌથી મોટો સપ્લાયર બનાવી દીધો છે. ભારત સતત એ વાતનો પુનરોચ્ચાર કરતું આવ્યું છે કે તે પોતાના નાગરિકોની ઉર્જાની જરૂરિયાતો અને રાષ્ટ્રીય હિતોને ધ્યાનમાં રાખીને કોઈપણ દેશ પાસેથી ક્રૂડ તેલ ખરીદવા માટે સ્વતંત્ર છે.