નવી દિલ્હી: વૈશ્વિક અર્થતંત્રમાં ચાલી રહેલી ઉથલપાથલ અને અમેરિકા તરફથી આંચકા મળવા છતાં, ભારતનું આર્થિક ભવિષ્ય ઉજ્જવળ રહેવાની શક્યતા છે. પેરિસ સ્થિત આર્થિક સહકાર અને વિકાસ સંગઠન (OECD) એ નાણાકીય વર્ષ ૨૦૨૬ માટે ભારતનો વિકાસ દર ૬.૭% પર જાળવી રાખ્યો છે, જે દર્શાવે છે કે ભારત વિશ્વની સૌથી ઝડપથી વિકસતી મુખ્ય અર્થવ્યવસ્થાઓમાં પોતાનું સ્થાન જાળવી રાખશે. OECDના મતે, ભારતનો આર્થિક પાયો મજબૂત સ્થાનિક માંગ, સરકાર દ્વારા કરવામાં આવતા મૂડી ખર્ચ અને નરમ ફુગાવાને કારણે મજબૂત છે, જે અર્થતંત્રને સતત ટેકો આપી રહ્યા છે.
જોકે સ્થાનિક અર્થતંત્ર મજબૂત છે, વિદેશી વેપાર મોરચે યુએસ ટેરિફને કારણે કેટલીક ચિંતા વ્યક્ત કરવામાં આવી છે. OECDના અહેવાલમાં ચેતવણી આપવામાં આવી છે કે યુનાઇટેડ સ્ટેટ્સ દ્વારા ભારતીય માલસામાન પર ટેરિફમાં કરાયેલો વધારો (જેમાં રશિયન તેલ આયાત પર ૨૫% દંડ સહિત કુલ ૫૦% ટેરિફનો સમાવેશ થાય છે) ભારતના GDP વૃદ્ધિ દરને નાણાકીય વર્ષ ૨૦૨૬ માં આશરે ૦.૪% ઘટાડી શકે છે. જોકે, દ્વિપક્ષીય વાટાઘાટોથી આ ટેરિફ ઘટવાની આશા પણ વ્યક્ત કરવામાં આવી છે.

સામાન્ય માણસ માટે રાહતની વાત એ છે કે ફુગાવો હવે નિયંત્રણમાં આવી રહ્યો છે. ઓક્ટોબરમાં છૂટક ફુગાવો ૦.૨૫% ના રેકોર્ડ નીચલા સ્તરે પહોંચી ગયો છે, જે મુખ્યત્વે ખાદ્યપદાર્થોના ભાવમાં ઘટાડાને કારણે શક્ય બન્યું છે. OECDનું અનુમાન છે કે જો ફુગાવો નિયંત્રણમાં રહેશે, તો રિઝર્વ બેંક ઓફ ઇન્ડિયા (RBI) વ્યાજ દરોમાં ઘટાડો કરી શકે છે. આનાથી નાણાકીય વર્ષ ૨૦૨૬-૨૭ સુધીમાં વ્યાજ દર ૫% સુધી ઘટી શકે છે, જેના પરિણામે ભવિષ્યમાં ઘર અને કાર લોન સસ્તી થવાની પ્રબળ શક્યતા છે.