નવી દિલ્હી : તાજેતરમાં પૂર્ણ થયેલી બિહાર વિધાનસભા ચૂંટણીમાં કારમી હારનો સામનો કર્યા પછી, આજનો દિવસ લાલુ પ્રસાદ યાદવ અને તેમના પરિવાર માટે વધુ મુશ્કેલ બની શકે છે. દિલ્હીના રાઉઝ એવન્યુ ખાતેની સ્પેશિયલ સીબીઆઈ કોર્ટ લેન્ડ ફોર જોબ્સ કેસમાં આરજેડી વડા લાલુ પ્રસાદ યાદવ, તેમના પુત્ર તેજસ્વી યાદવ અને ભૂતપૂર્વ મુખ્યમંત્રી રાબડી દેવી સામે આરોપો ઘડવા અંગે 4 ડિસેમ્બરે ચુકાદો આપે તેવી અપેક્ષા છે.

    ૧૦ નવેમ્બરના રોજ થયેલી છેલ્લી સુનાવણી દરમિયાન, કોર્ટે જણાવ્યું હતું કે તમામ પુરાવા અને દસ્તાવેજોની સંપૂર્ણ સમીક્ષા જરૂરી છે, અને તેથી, ચુકાદો ૪ ડિસેમ્બર, ૨૦૨૫ સુધી મુલતવી રાખવામાં આવ્યો હતો. અગાઉ, કોર્ટે ૨૫ ઓગસ્ટના રોજ CBI કેસમાં આરોપો ઘડવા અંગેનો નિર્ણય અનામત રાખ્યો હતો.

   સીબીઆઈએ આ કેસમાં ચાર્જશીટ દાખલ કરી છે, જેમાં આરોપ લગાવવામાં આવ્યો છે કે લાલુ પ્રસાદ યાદવના રેલ્વે મંત્રી તરીકેના કાર્યકાળ દરમિયાન, 2004 થી 2009 દરમિયાન રેલ્વેમાં ગ્રુપ ડી કેટેગરી માટે ભરતીઓ કરવામાં આવી હતી, જેમાં તેમના પદનો દુરુપયોગ કરીને અને નિયમોનું ઉલ્લંઘન કરીને કાવતરું ઘડવામાં આવ્યું હતું. બદલામાં, અરજદારોની જમીન લાલુ પ્રસાદ યાદવના પરિવાર અથવા તેમના નજીકના લોકોને ટ્રાન્સફર કરવામાં આવી હતી. 

  નોંધનીય છે કે આ સમયગાળા દરમિયાન, રાબડી દેવીએ કેસની સુનાવણી કરી રહેલા ન્યાયાધીશ વિશાલ ગોગણે પર પક્ષપાતનો આરોપ લગાવ્યો હતો અને ન્યાયાધીશ બદલવાની માંગ કરી હતી, જેના પર કોર્ટે સીબીઆઈ પાસેથી જવાબ માંગ્યો છે.