નવી દિલ્હી : ભારતની સૌથી મોટી એરલાઈન ઈન્ડિગો (IndiGo) છેલ્લા બે દિવસમાં સેંકડો ફ્લાઇટ્સ રદ થવા અને વિલંબિત થવાના કારણે ભારે દબાણ હેઠળ છે. એરલાઈને દેશના ઉડ્ડયન નિયમનકાર DGCA (ડાયરેક્ટર જનરલ ઓફ સિવિલ એવિએશન) ને જાણ કરી છે કે શેડ્યૂલને સ્થિર કરવાના પ્રયાસરૂપે આગામી બે થી ત્રણ દિવસ સુધી વધુ ફ્લાઈટ્સ રદ કરવાનું ચાલુ રાખવું પડશે.
જ્યારથી સોશિયલ મીડિયા પર મુસાફરોના ગુસ્સા સાથેની ફરિયાદોનો રાફડો ફાટ્યો છે, ત્યારથી DGCA એ ઈન્ડિગોના વરિષ્ઠ મેનેજમેન્ટને સામૂહિક રદ્દીકરણ અને લાંબા વિલંબ અંગે ખુલાસો આપવા માટે બોલાવ્યા હતા.
ઓપરેશન્સ સામાન્ય કરવાની પ્રાથમિકતા
ન્યૂઝ એજન્સી પીટીઆઈના અહેવાલ મુજબ, ઈન્ડિગોએ DGCA ને ખાતરી આપી છે કે વિક્ષેપો ઘટાડવા માટે તે ૮ ડિસેમ્બરથી ફ્લાઇટ ઓપરેશન્સ ઘટાડશે.
એરલાઈને તેના વિલંબ અને રદ્દીકરણ બદલ મુસાફરોની માફી માંગી છે. કંપનીના CEO પીટર એલ્બર્સ એ એક આંતરિક મેમોમાં જણાવ્યું હતું કે તેમની પ્રાથમિકતા ઓપરેશન્સને સામાન્ય બનાવવાની છે. તેમણે કહ્યું કે, "ઈન્ડિગોનું તાત્કાલિક લક્ષ્ય ઓપરેશન્સને સામાન્ય બનાવવાનું અને સમયની પાબંદી (punctuality) ને પાછી ટ્રેક પર લાવવાનું છે, જે સરળ લક્ષ્ય નથી."
સંકટ પાછળનું કારણ
નવા ફ્લાઇટ ડ્યુટી ટાઇમ લિમિટ (FDTL) ના નિયમો અને ક્રૂની અછત આ સંકટનું મુખ્ય કારણ હોવાની અટકળો વચ્ચે, એરલાઇન પાઇલોટ્સ એસોસિયેશન ઓફ ઇન્ડિયા (ALPA India) એ આ કટોકટી માટે વહીવટી આયોજન અને ગવર્નન્સની ઊંડી સમસ્યાઓ તરફ ધ્યાન દોર્યું છે.
ALPA India એ એક નિવેદનમાં જણાવ્યું હતું કે, "તાજેતરના ફ્લાઇટ રદ્દીકરણ, જે કથિત રીતે નવા FDTL ધોરણોને કારણે પાયલોટની અછતને આભારી છે, તે એરલાઇનનું મેનેજમેન્ટ, DGCA દ્વારા નિયમનકારી દેખરેખ અને બજારની ન્યાયીતા વિશે મહત્ત્વપૂર્ણ પ્રશ્નો ઉભા કરે છે."