ચંડીગઢ: પંજાબમાં વર્ષ 2027માં યોજાનારી વિધાનસભા ચૂંટણી પહેલા રાજકારણ ગરમાયું છે. કોંગ્રેસના નેતા નવજોત કૌર સિદ્ધુએ રાજ્યના રાજકારણમાં હલચલ મચાવતા મોટા દાવા કર્યા છે. રાજ્યપાલ ગુલાબ ચંદ કટારિયાને મળ્યા બાદ પત્રકારો સાથે વાતચીત કરતાં તેમણે જણાવ્યું કે કોંગ્રેસ પક્ષમાં મુખ્ય પ્રધાન પદ માટે પહેલેથી જ પાંચ નેતાઓ દાવો કરી રહ્યા છે અને તેઓ પક્ષ વિરુદ્ધ કામ કરી રહ્યા છે. આ નિવેદન પંજાબ કોંગ્રેસની અંદર ચાલી રહેલા આંતરિક વિખવાદ અને નેતૃત્વની ખેંચતાણ તરફ સ્પષ્ટ ઈશારો કરે છે. નવજોત કૌરનો આ ખુલાસો એવા સમયે આવ્યો છે જ્યારે નવજોત સિંહ સિદ્ધુ સક્રિય રાજકારણથી થોડા દૂર છે.
નવજોત કૌર સિદ્ધુએ સ્પષ્ટ શબ્દોમાં કહ્યું કે તેમના પતિ નવજોત સિંહ સિદ્ધુ સક્રિય રાજકારણમાં પરત ફરશે કે કેમ, તે માત્ર કોંગ્રેસ પક્ષના નિર્ણય પર નિર્ભર કરે છે. તેમણે જણાવ્યું કે, જો કોંગ્રેસ તેમને મુખ્ય પ્રધાન પદના ઉમેદવાર તરીકે જાહેર કરે, તો જ તેઓ પરત ફરી શકે છે. તેમણે દાવો કર્યો કે હાલના પાંચ હરીફ નેતાઓ સિદ્ધુને આગળ નહીં આવવા દે. જોકે, તેમણે આ નેતાઓના નામનો ખુલાસો કર્યો નહોતો. જ્યારે પત્રકારોએ તેમને પૂછ્યું કે શું નવજોત સિંહ સિદ્ધુ ભાજપમાં પરત ફરવાનું વિચારી શકે છે જો ભાજપ તેમને સીએમનો ચહેરો જાહેર કરે? આ સવાલના જવાબમાં નવજોત કૌરે કહ્યું, “હું તેમના વતી કોઈ ટિપ્પણી ન કરી શકું. કોંગ્રેસ તેમને મુખ્ય પ્રધાનપદના ચહેરા તરીકે જાહેર કરશે તો તેઓ સક્રિય રાજકારણમાં પાછા ફરશે, નહીં તો તેઓ સારા પૈસા કમાઈ રહ્યા છે અને તેઓ ખુશ છે.”
નવજોત કૌર સિદ્ધુએ આ દરમિયાન મુખ્ય પ્રધાન ભગવંત માન અને આમ આદમી પાર્ટી (AAP) પર પણ ગંભીર આરોપો લગાવ્યા હતા. તેમણે કહ્યું કે શિવાલિક રેન્જમાં કહેવાતા VVIPs એ જમીન પર કબજો કર્યો છે અને મુખ્ય પ્રધાન ભગવંત માન તેને કાયદેસર બનાવવા જઈ રહ્યા છે. આ ઉપરાંત, તેમણે કોંગ્રેસ પક્ષની આર્થિક સ્થિતિ પર પણ ટિપ્પણી કરી હતી, કે પક્ષને આપવા માટે તેમની પાસે નાણા નથી, પરંતુ તેઓ પંજાબને “સુવર્ણ રાજ્ય” બનાવી શકે છે. તેમણે એ વાતનો પણ ઉલ્લેખ કર્યો કે નવજોત સિંહ સિદ્ધુ કોંગ્રેસ અને પાર્ટી નેતા પ્રિયંકા ગાંધી વાડ્રા સાથે નજીકથી જોડાયેલા છે.