નવી દિલ્હી: બોલિવૂડની અભિનેત્રી સેલિના જેટલી છેલ્લા ઘણા સમયથી UAEની જેલમાં કેદ પોતાના ભાઈ, રિટાયર્ડ મેજર વિક્રાંત કુમાર જેટલીને મુક્ત કરાવવા માટે કાનૂની લડત લડી રહી છે. સેલિનાએ આ અંગે દિલ્હી હાઈ કોર્ટમાં અરજી દાખલ કરી હતી, જેની તાજેતરમાં સુનાવણી હાથ ધરવામાં આવી હતી. આ સુનાવણી બાદ સેલિના જેટલીને પોતાના ભાઈના પરત ફરવાની આશાનું કિરણ દેખાયું છે. કોર્ટમાં વિદેશ મંત્રાલયે (MEA) પોતાના સ્ટેટસ રિપોર્ટમાં જણાવ્યું કે, વિક્રાંત જેટલી સુધી પહોંચવા અને તેમના કેસનું નિરાકરણ લાવવા માટે એક નોડલ અધિકારીની નિમણૂક કરી દેવામાં આવી છે. આ મહત્ત્વના પગલાથી સેલિના અને તેના પરિવારને મોટી રાહત મળી છે, કારણ કે તેઓ છેલ્લા 15 મહિનાથી વિક્રાંત સાથે કોઈ સંપર્ક કરી શક્યા નહોતા.
સેલિના જેટલીની અરજી મુજબ, તેમના ભાઈ વિક્રાંત કુમાર જેટલી UAEની એક મેટિટી ગૃપમાં ટ્રેડિંગ, કન્સલ્ટિંગ અને રિસ્ક મેનેજમેન્ટ જેવા કામ સાથે જોડાયેલા હતા. તેમની ધરપકડ 6 સપ્ટેમ્બર, 2024 ના રોજ UAEમાં કરવામાં આવી હતી. અરજીમાં ગંભીર આરોપ લગાવવામાં આવ્યો હતો કે તેમનું ગેરકાયદેસર અપહરણ કરીને કસ્ટડીમાં રાખવામાં આવ્યા છે. સેલિનાએ વિદેશ મંત્રાલય પર આક્ષેપ કર્યો હતો કે એક વર્ષથી વધુ સમય વીતી ગયો હોવા છતાં મંત્રાલય આ અંગે પ્રાથમિક માહિતી મેળવવામાં નિષ્ફળ રહ્યું છે. અભિનેત્રી સતત સોશિયલ મીડિયા પર પોસ્ટ કરીને પોતાના ભાઈ માટે ન્યાયની માંગણી કરતી રહી છે, જેના કારણે આ કેસને જાહેર સ્તરે પણ ધ્યાન મળ્યું છે.
દિલ્હી હાઈકોર્ટમાં એડિશનલ સોલિસિટર જનરલ અને સીનિયર વકીલ ચેતન શર્માએ વિદેશ મંત્રાલય વતી કોર્ટને વિશ્વાસ અપાવ્યો હતો. તેમણે જણાવ્યું કે, મંત્રાલય વિક્રાંત કુમાર જેટલી સુધી પહોંચવા માટે પૂરતા પ્રયાસો કરી રહ્યું છે અને ટૂંક સમયમાં સેલિનાને વિક્રાંત સાથે વાતચીત કરાવવાની વ્યવસ્થા કરવામાં આવશે. મંત્રાલય દ્વારા નોડલ અધિકારીની નિમણૂક થતાં આંતરરાષ્ટ્રીય સ્તરે કેસને ઝડપી બનાવવાની દિશામાં આ એક મોટું પગલું છે. કોર્ટની આ સકારાત્મક સુનાવણી બાદ સેલિના જેટલીએ સોશિયલ મીડિયા પર પોતાની લાગણી વ્યક્ત કરી હતી.
સેલિના જેટલીએ સોશિયલ મીડિયા પોસ્ટમાં જણાવ્યું, "મમ્મી અને પપ્પા... હું મારી તરફથી તમામ પ્રકારના પ્રયત્નો કરી રહી છું. છેલ્લા 15 મહિનાથી વિક્રાંત સાથે વાત થઈ નથી. આજે આશાનું કિરણ દેખાયું છે. થેન્ક યૂ યુનિવર્સ." આ ઘટના માત્ર સેલિના જેટલીના પરિવાર માટે જ નહીં, પરંતુ વિદેશમાં ફસાયેલા અન્ય ભારતીય નાગરિકોના કેસમાં પણ ભારતીય વિદેશ મંત્રાલયની સક્રિયતા અને કોર્ટની ભૂમિકાનું મહત્ત્વ દર્શાવે છે. સેલિના જેટલી હવે આશા રાખી રહી છે કે નોડલ અધિકારીની નિમણૂક બાદ તેના ભાઈને વહેલી તકે UAEની જેલમાંથી મુક્ત કરીને ભારત પરત લાવવામાં આવશે.