માતૃભૂમિના રક્ષકોને સલામઃ ‘સશસ્ત્ર સેના ધ્વજ દિવસ', ૧૯૪૯થી શરૂ થયેલી ગૌરવશાળી પરંપરા
૭ ડિસેમ્બરે સમગ્ર દેશ ભારતીય સેનાના અદમ્ય સાહસ અને બલિદાનને યાદ કરીને સશસ્ત્ર સેના ધ્વજ દિવસની ઉજવણી કરી રહ્યો છે. ૧૯૪૯થી અવિરતપણે ઉજવાતા આ દિવસનો મુખ્ય હેતુ દેશની સરહદો સાચવતા સૈનિકો, નિવૃત્ત જવાનો અને શહીદ પરિવારોને આર્થિક મદદ અને સન્માન આપવાનો છે. સોશિયલ મીડિયા પર પણ દેશભક્તિનો માહોલ જોવા મળી રહ્યો છે અને લોકો જવાનોને શ્રદ્ધાંજલિ આપી રહ્યા છે.
ભારતભરમાં ૭ ડિસેમ્બરના રોજ સશસ્ત્ર સેના ધ્વજ દિવસ (આર્મ્ડ ફોર્સીઝ ફલેગ ડે) મનાવવામાં આવ્યો. આ દિવસ ભારતીય સશસ્ત્ર દળોના જવાનો, નાવિકો અને વાયુસેનાના યોદ્ધાઓના સન્માનમાં સમર્પિત છે. દેશની રક્ષા કાજે પોતાના પ્રાણ ન્યોછાવર કરનારા શહીદો અને હાલમાં ફરજ બજાવતા વીર જવાનો પ્રત્યે કૃતજ્ઞતા વ્યક્ત કરવાનો આ એક વિશેષ અવસર છે.
ઈતિહાસ અને શરૂઆતઃ આ દિવસની ઉજવણીનો ઈતિહાસ ઘણો જૂનો છે. ભારતને આઝાદી મળ્યા બાદ, સરકારને લાગ્યું કે દેશની સુરક્ષા કરતા સૈનિકો અને તેમના પરિવારોની સંભાળ રાખવી એ નાગરિકોની પણ ફરજ છે. આ હેતુસર, ૨૮ ઓગસ્ટ ૧૯૪૯ના રોજ રક્ષા મંત્રીના નેતૃત્વમાં એક સમિતિની રચના કરવામાં આવી હતી. આ સમિતિએ દર વર્ષે ૭ ડિસેમ્બરે ધ્વજ દિવસ ઉજવવાનું નક્કી કર્યું હતું. આમ, ૧૯૪૯થી ભારતમાં નિયમિતપણે આ દિવસની ઉજવણી કરવામાં આવે છે.
દિવસનું મહત્વ અને ઉદ્દેશ્યઃ આ દિવસનો મુખ્ય ઉદ્દેશ્ય સશષા દળોના કર્મચારીઓ માટે ભંડોળ એકત્ર કરવાનો છે. સામાન્ય નાગરિકો નાના ધ્વજ ખરીદીને અથવા દાન આપીને આ ભંડોળમાં યોગદાન આપે છે. એકત્ર થયેલી રકમનો ઉપયોગ યુદ્ધમાં વિકલાંગ થયેલા સૈનિકોના પુનર્વસન, શહીદ થયેલા સૈનિકોના પરિવારોની આર્થિક મદદ અને નિવૃત્ત સૈનિકો તથા તેમના પરિવારોના કલ્યાણ માટે કરવામાં આવે છે. કેન્દ્રીય સૈનિક બોર્ડ દ્વારા આ ભંડોળનું વ્યવસ્થાપન કરવામાં આવે છે.
સોશિયલ મીડિયા પર દેશભક્તિનો જુવાળઃ આજના દિવસે સોશિયલ મીડિયા પર પણ દેશભક્તિનો માહોલ જોવા મળી રહ્યો છે. લોકો કવિતાઓ અને સંદેશાઓ દ્વારા વીરોને યાદ કરી રહ્યા છે. એક યુઝરે પ્રસિદ્ધ કવિ શ્યામલાલ ગુપ્ત પાર્ષદની પંક્તિઓ શેર કરતા લખ્યું છે, વિજયી વિશ્વ તિરંગા પ્યારા, ઝંડા ઊંચા રહે હમારા... સદા શક્તિ બરસાને વાલા, વીરોં કો હર્ષાને વાલા. આજના દિવસે નાગરિકોને પણ યથાશક્તિ યોગદાન આપીને દેશના રક્ષકો પ્રત્યે પોતાની ફરજ અદા કરવા અપીલ કરવામાં આવે છે.
(10:29 AM IST)
છેલ્લા 8 દિવસમાં સૌથી લોકપ્રિય 
