ઓક્ટોબરમાં તેમણે ભારતની ટૂંકી મુલાકાત લીધી હતી અને નરેન્દ્રભાઈ મોદીને મળ્યા હતા
ભારતના નવા અમેરિકન રાજદૂત સર્ગિયો ગોર જાન્યુઆરીના મધ્યમાં દિલ્હી પહોંચશેઃ ટ્રમ્પના અત્યંત નજીકના માનવામાં આવે છે
નવી દિલ્હી તા.૨૫: અમેરિકાના નવનિયુક્ત રાજદૂત સર્ગિયો ગોર જાન્યુઆરી ૨૦૨૬ ના મધ્ય સુધીમાં નવી દિલ્હી આવીને પોતાનો કાર્યભાર સંભાળી લેશે. રાષ્ટ્રપતિ ડોનાલ્ડ ટ્રમ્પના વિશ્વાસુ ગણાતા ગોર ભારત અને અમેરિકા વચ્ચેના સંબંધોને નવી ઊંચાઈએ લઈ જવા માટે તૈયાર છે.
ભારત અને અમેરિકાના રાજદ્વારી સંબંધોમાં એક નવા અધ્યાયની શરૂઆત થવા જઈ રહી છે. પ્રાપ્ત અહેવાલો અનુસાર, ભારતમાં અમેરિકાના નવા રાજદૂત તરીકે નિયુક્ત થયેલા સર્ગિયો ગોર જાન્યુઆરી ૨૦૨૬ ના મધ્ય ભાગમાં ભારત આવી પહોંચશે અને સત્તાવાર રીતે પોતાની જવાબદારી સંભાળશે. તાજેતરમાં જ વ્હાઇટ હાઉસ ખાતે એક ભવ્ય સમારોહમાં ઉપરાષ્ટ્રપતિ જે.ડી. વેન્સ દ્વારા તેમને હોદ્દાના શપથ લેવડાવવામાં આવ્યા હતા, જેમાં રાષ્ટ્રપતિ ડોનાલ્ડ ટ્રમ્પ પણ ખાસ ઉપસ્થિત રહ્યા હતા.
સર્ગિયો ગોર રાષ્ટ્રપતિ ટ્રમ્પના અત્યંત નજીકના અને વિશ્વાસુ સાથીદારોમાં ગણાય છે. તેઓ અગાઉ વ્હાઇટ હાઉસમાં પ્રેસિડેન્શિયલ પર્સનલ ઓફિસના ડાયરેક્ટર તરીકે મહત્વની કામગીરી બજાવી ચૂક્યા છે. તેમની આ નિયુક્તિ ભારત સાથેના સંબંધોને અમેરિકા કેટલું મહત્વ આપે છે તે દર્શાવે છે. ટ્રમ્પે પોતે ગોરની પ્રશંસા કરતા કહ્યું હતું કે તેઓ ભારત સાથેની વ્યૂહાત્મક ભાગીદારીને વધુ મજબૂત બનાવશે.
નવી દિલ્હીમાં અમેરિકન દૂતાવાસમાં પણ ગોરના આગમનને લઈને તૈયારીઓ તેજ કરી દેવામાં આવી છે. સૂત્રોના જણાવ્યા મુજબ, ગોર પરંપરાગત સરકારી અધિકારીઓને બદલે પોતાના ખાસ વિશ્વાસુ સહાયકોની ટીમ સાથે દિલ્હી આવશે, જેઓ ભારત-અમેરિકા સંબંધોને આગળ વધારવામાં મદદ કરશે. આ ફેરફારોના ભાગરૂપે, હાલમાં દિલ્હીમાં ફરજ બજાવતા વરિષ્ઠ અમેરિકન અધિકારી જોર્ગન કે. એન્ડ્રુઝને પદ છોડવા માટે જણાવવામાં આવ્યું હોવાના અહેવાલ છે.
સર્ગિયો ગોર માત્ર રાજદૂત જ નહીં, પરંતુ દક્ષિણ અને મધ્ય એશિયા માટેના વિશેષ દૂત તરીકેની બેવડી જવાબદારી પણ નિભાવશે. તેમનો મુખ્ય ઉદ્દેશ્ય બંને દેશો વચ્ચેના વેપાર, સુરક્ષા અને વ્યૂહાત્મક સંબંધોને વધુ ગાઢ બનાવવાનો રહેશે. ઓક્ટોબર ૨૦૨૫ માં તેમણે ભારતની ટૂંકી મુલાકાત લીધી હતી અને વડાપ્રધાન નરેન્દ્રભાઈ મોદી તથા અન્ય મંત્રીઓ સાથે મુલાકાત કરી હતી. તેમનું આગમન ભારત અને અમેરિકા વચ્ચેના સહયોગને એક નવી દિશા આપશે તેવી અપેક્ષા રાખવામાં આવી રહી છે.
(11:13 AM IST)
છેલ્લા 8 દિવસમાં સૌથી લોકપ્રિય 
