લંડન : પાકિસ્તાનના ગૃહમંત્રી અને પાકિસ્તાન ક્રિકેટ બોર્ડના અધ્યક્ષ મોહસીન નકવીની કારની લંડનમાં બ્રિટિશ વિદેશ કાર્યાલય માં પ્રવેશતા પહેલા કરાયેલી સઘન સુરક્ષા તપાસનો વીડિયો સોશિયલ મીડિયા પર વાયરલ થતાં હંગામો મચી ગયો છે. વીડિયોમાં સ્પષ્ટપણે જોઈ શકાય છે કે પોલીસે તેમની કારના દરેક ખૂણાની તપાસ કરી હતી, જ્યારે નકવી પોતે કારમાં બેઠા રહ્યા હતા.

સોશિયલ મીડિયા યુઝર્સ આ ઘટનાને પાકિસ્તાની નેતાઓનો વિદેશમાં 'આદર' કેવી રીતે કરવામાં આવે છે અને તેમને કેવી દૃષ્ટિએ જોવામાં આવે છે, તેના ઉદાહરણ તરીકે ટાંકી રહ્યા છે. યુઝર્સના મતે, પોલીસે સંભવિત ડ્રગ્સ અથવા વિસ્ફોટકોની તપાસ માટે ટ્રંક ખોલી હતી. ઉલ્લેખનીય છે કે, પાકિસ્તાની નેતાઓને યુએસ, યુકે અને યુરોપ જેવા દેશોના પ્રવાસો દરમિયાન અવારનવાર આવી કડક સુરક્ષા તપાસોનો સામનો કરવો પડે છે. આ ઘટના પાકિસ્તાનના ઉચ્ચ અધિકારીઓની વિદેશોમાં સુરક્ષા પ્રત્યેની સંવેદનશીલતાને રેખાંકિત કરે છે.

આ ઘટના એવા સમયે બની છે જ્યારે પાકિસ્તાની રાજકારણીઓની વિદેશ યાત્રાઓ ચર્ચામાં છે. તાજેતરમાં, પાકિસ્તાની સેનેટર ઐમલ વાલી ખાને ગૃહમાં પ્રશ્ન ઉઠાવ્યો હતો કે આર્મી ચીફ ફિલ્ડ માર્શલ અસીમ મુનીરે વ્હાઇટ હાઉસમાં અમેરિકન રાષ્ટ્રપતિને દુર્લભ પૃથ્વી ખનિજો (Rare Earth Minerals) ની ભેટ કેવી રીતે આપી હતી, જેનાથી પાકિસ્તાનમાં જોવા મળતા ખનિજોમાં અમેરિકાનો રસ ઉજાગર થયો હતો. મોહસીન નકવી સિટી મીડિયા ગ્રુપના સ્થાપક છે અને ફેબ્રુઆરી ૨૦૨૪ થી પીસીબીના અધ્યક્ષ તરીકે પણ સેવા આપી રહ્યા છે.