નવીદિલ્હી: ભારત અને અમેરિકા વચ્ચેના વ્યાપારી સંબંધોમાં રહેલા અવરોધો દૂર કરવા માટે અમેરિકાનું ઉચ્ચ સ્તરીય પ્રતિનિધિમંડળ ભારત આવ્યું છે. ખાસ કરીને આયાત ડ્યૂટી અને ટેરિફના મુદ્દે બંને દેશો વચ્ચે મહત્ત્વની ચર્ચા થશે.

ભારત અને અમેરિકા વચ્ચે વ્યાપારી સંબંધોને નવી ઊંચાઈએ લઈ જવા માટે અમેરિકાની એક ઉચ્ચ સ્તરીય ટીમ ભારતની મુલાકાતે આવી પહોંચી છે. દિલ્હીમાં યોજાનારી આ બેઠકોમાં મુખ્યત્વે ’ટેરિફ ડીલ’ પર ધ્યાન કેન્દ્રિત કરવામાં આવશે. અમેરિકા લાંબા સમયથી ભારત દ્વારા અમેરિકન ઉત્પાદનો પર લગાડવામાં આવતી ઊંચી આયાત ડ્યૂટી અંગે રજૂઆતો કરી રહ્યું છે. આ મુલાકાત દરમિયાન અમેરિકન ડેલિગેશન વાણિજ્ય મંત્રાલયના ઉચ્ચ અધિકારીઓ સાથે બેઠક યોજીને ટેકનોલોજી, કૃષિ ઉત્પાદનો અને હાર્લી ડેવિડસન જેવી બાઈક્સ પરના ટેક્સ ઘટાડવા અંગે ભાર મૂકશે.

બીજી તરફ, ભારત પણ પોતાની નિકાસને પ્રોત્સાહન આપવા અને અમેરિકામાં ભારતીય પ્રોફેશનલ્સ માટે વિઝાના નિયમો સરળ બનાવવા માટે રજૂઆત કરશે. આર્થિક નિષ્ણાતોના મતે, આ બેઠક બંને દેશો વચ્ચેના મુક્ત વ્યાપાર કરાર (FTA) તરફનું એક મહત્ત્વનું પગલું સાબિત થઈ શકે છે. આગામી સમયમાં બંને દેશો વચ્ચે વ્યાપારિક ખાધ ઘટાડવા અને સપ્લાય ચેઈનને વધુ મજબૂત બનાવવા માટે આ ચર્ચાઓ નિર્ણાયક સાબિત થશે.