મુંબઈ: બોલિવૂડમાં ગીતોની માલિકીનો એક નવો વિવાદ ઊભો થયો છે, જેમાં સંગીતકાર-ગાયક દંપતી સચેત ટંડન અને પરંપરા ટંડનએ સાથી સંગીતકાર અમાલ મલિક પર આકરા પ્રહારો કર્યા છે. આ વિવાદનું કારણ અમાલ મલિકનો એ દાવો છે કે બ્લોકબસ્ટર ફિલ્મ 'કબીર સિંહ'નું સુપરહિટ ગીત "બેખયાલી" મૂળરૂપે તેમની રચના હતી. અમાલના આ નિવેદનથી નારાજ થઈને, સચેત અને પરંપરાએ ઇન્સ્ટાગ્રામ પર એક સંયુક્ત વિડિયો રિલીઝ કર્યો છે, જેમાં તેમણે અમાલ મલિકના દાવાઓને સ્પષ્ટપણે નકારી કાઢ્યા છે અને તેમની પાસેથી જાહેર માફીની માંગણી કરી છે.

સચેત અને પરંપરાએ તેમના વિડિયોમાં ભારપૂર્વક જણાવ્યું કે 'બેખયાલી'ની રચના, સંગીત અને ગોઠવણી સંપૂર્ણપણે તેમની છે અને જ્યારે ગીત બની રહ્યું હતું ત્યારે આખી 'કબીર સિંહ' ટીમ હાજર હતી. તેમણે અમાલના દાવાઓને "સંપૂર્ણપણે ખોટા" ગણાવ્યા અને કહ્યું કે આનાથી તેમની માનસિક શાંતિ અને પ્રતિષ્ઠા પર અસર થઈ છે. અમાલ મલિકે દાવો કર્યો હતો કે તેમણે અને સંદીપ રેડ્ડી વાંગાએ આખું આલ્બમ કમ્પોઝ કર્યું હતું, પરંતુ પાછળથી તેમનું યોગદાન એક ગીત પૂરતું સીમિત હતું, અને 'બેખયાલી' તેમની આપવામાં આવેલી સંદર્ભ ધૂન પર આધારિત હતું.

દંપતીએ અમાલ મલિકના એ આક્ષેપનો પણ જવાબ આપ્યો કે તેઓ 'મનપસંદ લેબલ' સાથે જોડાયા હતા. તેમણે સ્પષ્ટતા કરી કે 'કબીર સિંહ' પહેલા તેઓ ક્યારેય ટી-સીરીઝનો ભાગ નહોતા. સચેત અને પરંપરાએ પ્રશ્ન કર્યો કે જો ગીત ચોરાઈ ગયું હતું, તો અમાલે રિલીઝ પછી તેમને અભિનંદન કેમ આપ્યા અને મેસેજ કરીને કહ્યું કે તે તેમના ગીતની રાહ જોઈ રહ્યા હતા? દંપતીએ ચેતવણી આપી છે કે જો અમાલ મલિક જાહેર માફી નહીં માંગે તો તેઓ તેમની સામે કાનૂની કાર્યવાહી કરશે.