નવી દિલ્હી: નવા શ્રમ સંહિતાને લઈને કર્મચારીઓના પગાર માળખામાં ફેરફાર અને ખાસ કરીને ટેક-હોમ પગાર ઘટવા અંગેની મૂંઝવણ પર શ્રમ મંત્રાલયે સ્પષ્ટતા કરી છે. મંત્રાલયે જણાવ્યું છે કે જે કર્મચારીઓના પ્રોવિડન્ટ ફંડ (PF) કપાત ₹૧૫,૦૦૦ ની નિર્ધારિત વેતન મર્યાદાપર આધારિત છે, તેમના ટેક-હોમ પગારમાં કોઈ ઘટાડો થશે નહીં. મંત્રાલયે સોશિયલ મીડિયા પર સમજાવ્યું કે, ફરજિયાત PF કપાત ₹૧૫,૦૦૦ સુધીના મૂળ પગાર પર જ કરવામાં આવશે, અને તેનાથી વધુનું યોગદાન વૈકલ્પિક રહેશે.

આ સ્પષ્ટતા ખાસ કરીને એવા કર્મચારીઓ માટે રાહતરૂપ છે જેમનો મૂળ પગાર ₹૧૫,૦૦૦ થી ઓછો છે, પરંતુ નવા કોડ હેઠળ તેમનો સુધારેલો મૂળ પગાર વધે છે. જો PF કપાત વેતન મર્યાદા પર આધારિત હોય, તો તમારો ટેક-હોમ પગાર ઘટશે નહીં. જો કે, જે કંપનીઓ વેતન મર્યાદાને બદલે કર્મચારીના સંપૂર્ણ મૂળ પગાર (actual Basic Pay) પર PF કાપે છે, ત્યાં નવા ૫૦% મૂળ પગારના નિયમને કારણે PF યોગદાન વધી શકે છે, અને આવી સ્થિતિમાં ટેક-હોમ પગાર ઘટશે.

જો કોઈ કર્મચારીનો કુલ માસિક પગાર ₹60,000 છે, જેમાં ₹20,000 નો મૂળ પગાર અને ₹40,000 ના અન્ય ભથ્થાઓનો સમાવેશ થાય છે, તો વર્તમાન નિયમો અનુસાર, જો પીએફ કપાત સંપૂર્ણ મૂળ પગાર પર આધારિત હોય, તો નોકરીદાતાનું 12% યોગદાન અને કર્મચારીનું 12% યોગદાન બંને ₹20,000 ના મૂળ પગાર પર ગણવામાં આવશે. આ ₹2,400 + ₹2,400 = ₹4,800 હશે.પરંતુ નવા શ્રમ સંહિતાના અમલીકરણ સાથે, આ યોગદાન ₹20,000 + ₹10,000 અથવા ₹30,000 પર કરવાનું રહેશે.

મંત્રાલયની સ્પષ્ટતા સ્પષ્ટ કરે છે કે ₹૧૫,૦૦૦ થી વધુ મૂળ પગાર ધરાવતા કર્મચારીઓ માટે PF યોગદાન વધારવું એ કર્મચારીનો પોતાનો નિર્ણય છે, જ્યાં સુધી તેમની કંપની PF કપાત માટે વેતન મર્યાદાને વળગી રહે છે. જોકે, નવા શ્રમ સંહિતામાં 'મૂળ પગાર'ની વ્યાખ્યા બદલવામાં આવી છે, જેમાં ભથ્થાંની કુલ રકમ પગારના ૫૦% થી વધુ ન હોવી જોઈએ. આનાથી ઘણા કર્મચારીઓનો મૂળ પગાર વધી જશે. તેથી, અંતે ટેક-હોમ પગાર પરની અસર કંપનીની PF કપાત નીતિ અને કર્મચારીની પસંદગી પર નિર્ભર રહેશે, નહીં કે માત્ર સરકારી નોટિફિકેશન પર.