રખાઇન પ્રાંત, તા. ૧૨ ડિસેમ્બર, ૨૦૨૫ : ભારતના પડોશી દેશ મ્યાનમારના રખાઇન પ્રાંતમાં મિલિટરી જુન્ટા (સૈન્ય સરકાર) અને અરાકાન આર્મી (AA) વચ્ચે ચાલી રહેલા સંઘર્ષની વચ્ચે એક અત્યંત દુઃખદ અને હૃદયદ્રાવક ઘટના સામે આવી છે. તાજેતરમાં, જુન્ટાએ કરેલા હવાઈ હુમલામાં એક હોસ્પિટલ સંપૂર્ણપણે મલબામાં ફેરવાઈ ગઈ હતી, જેમાં ઓછામાં ઓછા ૩૪ લોકો માર્યા ગયા છે અને ૮૦ થી વધુ ગંભીર રીતે ઘાયલ થયા છે.
પ્રાપ્ત માહિતી અનુસાર, અરાકાન આર્મીના નિયંત્રણ હેઠળના આ વિસ્તારમાં ગુરુવારે રાત્રે ૯.૧૩ વાગ્યે જુન્ટાએ હુમલો કર્યો હતો. બચાવ દળ સાથે જોડાયેલા એક અધિકારીએ જણાવ્યું કે એક લડાકુ વિમાને હોસ્પિટલ પર બે ભારે બોમ્બ ફેંક્યા હતા. પ્રથમ બોમ્બ હોસ્પિટલના રિકવરી વોર્ડ પર પડ્યો અને બીજો મુખ્ય ઇમારતની નજીક ફાટ્યો. આ વિસ્ફોટ એટલો જોરદાર હતો કે આખી હોસ્પિટલ પત્તાના મહેલની જેમ ધરાશાયી થઈ ગઈ હતી, જેના પગલે વિસ્તારમાં ભય અને ચીસોનો માહોલ ફેલાઈ ગયો હતો.
બચાવ દળના અધિકારીએ જણાવ્યું કે જ્યારે ટીમ રેસ્ક્યુ માટે પહોંચી, ત્યારે દ્રશ્ય ભયાવહ હતું. સ્થળ પરથી ૧૭ પુરુષો અને ૧૭ મહિલાઓ સહિત કુલ ૩૪ મૃતદેહો મળી આવ્યા હતા. તેમણે કહ્યું કે હજુ પણ ઘણા લોકો કાટમાળ નીચે દબાયેલા હોવાની અને ૮૦ ઘાયલોની ગંભીર હાલત હોવાથી મૃતકોનો આંકડો વધી શકે છે.
રાજકીય સંઘર્ષ અને પ્રતિસાદ:
રખાઇન રાજ્યમાં લાંબા સમયથી સંઘર્ષ અને અસ્થિરતા ચાલી રહી છે. અરાકાન આર્મી લાંબા સમયથી મ્યાનમાર સરકાર પાસેથી સ્વાયત્તતાની માંગ કરી રહી છે અને નવેમ્બર ૨૦૨૩ થી શરૂ કરાયેલા અભિયાનમાં તેણે ૧૭ માંથી ૧૪ ટાઉનશીપ પર પોતાનો પ્રભુત્વ સ્થાપિત કરી દીધો છે.
જોકે, મ્યાનમારની મિલિટરી સરકારે (જુન્ટા) આ કાર્યવાહી કરવાનો ઇનકાર કર્યો છે અને કહ્યું કે આવા કોઈ પણ હુમલાની મંજૂરી આપવામાં આવી નહોતી. પરંતુ સ્વતંત્ર મીડિયા અને બચાવ દળોએ તેને સૈન્યનો હુમલો જ માન્યો છે. મ્યાનમારની છાયા સરકાર (National Unity Government) એ આ હુમલાને જાણી જોઈને અને યોજનાબદ્ધ રીતે કરાયેલો ગણાવ્યો છે અને નિર્દોષ લોકોની હત્યા બદલ આંતરરાષ્ટ્રીય સમુદાયને જુન્ટાને રોકવા માટે કડક પગલાં લેવા અને તાત્કાલિક માનવીય સહાય પહોંચાડવા માટે અપીલ કરી છે.