રાહુલ ગાંધીએ સંસદમાં વાયુ પ્રદુષણનો મુદ્દો ઉઠાવ્યોઃ ચર્ચા કરવાની માંગ
કેન્દ્ર સરકારે આપી સહકારની ખાતરીઃ તમામ પક્ષોને એક સાથે આવવાની અપીલ કરી
નવી દિલ્હી, તા.૧૨: લોકસભાના શિયાળુ સત્ર દરમિયાન રાજકીય મુદ્દાઓ પર ગરમાવો પ્રવર્તી રહ્યો છે, ત્યારે વિપક્ષના નેતા અને કોંગ્રેસના સાંસદ રાહુલ ગાંધીએ દેશના ગંભીર વાયુ પ્રદૂષણના મુદ્દાને ઉઠાવીને તમામ પક્ષોને એકસાથે આવવાની અપીલ કરી છે. તેમણે શૂન્ય કલાક દરમિયાન આ મુદ્દો ઉઠાવ્યો હતો અને તેને રાષ્ટ્રીય આરોગ્ય કટોકટી ગણાવ્યો હતો. રાહુલ ગાંધીએ સ્પષ્ટપણે કહ્યું હતું કે, આ એક એવી સમસ્યા છે જેના પર શાસક પક્ષ અને વિપક્ષ બંને એક સામાન્ય એજન્ડા પર પહોંચી શકે છે. આ કોઈ વિચારધારાનો વિષય નથી. તેમના મતે, પ્રદૂષણ લાખો બાળકોના ફેફસાના રોગ, કેન્સર અને વળદ્ધોને શ્વાસ લેવામાં પડતી તકલીફોનું મુખ્ય કારણ છે, તેથી સંસદે દોષારોપણ કરવાને બદલે ઉકેલો શોધવા પર ધ્યાન કેન્દ્રિત કરવું જોઈએ. રાહુલ ગાંધીના આ સકારાત્મક અને ગંભીર મુદ્દાને સરકારે પણ તરત જ સમર્થન આપ્યું હતું. કેન્દ્રીય મંત્રી કિરેન રિજિજુએ સરકાર વતી જવાબ આપતા જણાવ્યું હતું કે, આ મુદ્દો બિઝનેસ એડવાઇઝરી કમિટીની બેઠકમાં ઉઠાવવામાં આવ્યો હતો અને સરકાર તેના પર ચર્ચા કરવા માટે સંપૂર્ણપણે તૈયાર છે. આ બંને મુખ્ય પક્ષો દ્વારા જાહેર કરાયેલો સહકારનો સૂર એ સંકેત આપે છે કે, રાષ્ટ્રીય મહત્વના મુદ્દાઓ પર સર્વપક્ષીય સહમતી માટે સંસદમાં હકારાત્મક વાતાવરણ બની શકે છે. રાહુલ ગાંધીએ વડા પ્રધાન નરેન્દ્ર મોદીને પણ વાયુ પ્રદૂષણને સંબોધવા માટે એક વ્યાપક યોજના રજૂ કરવા માટે વિનંતી કરી હતી.
રાહુલ ગાંધીએ ભારપૂર્વક જણાવ્યું હતું કે, આપણા મોટાભાગના મુખ્ય શહેરોમાં ઝેરી હવાનો થર ફેલાયેલો છે, અને આ સમસ્યા સામે સહયોગ કરવા માટે તમામ સાંસદોની સંમતિ હશે. વિપક્ષના નેતા તરીકે તેમણે રાજકીય લડાઈઓથી ઉપર ઉઠીને આ જાહેર આરોગ્યના મુદ્દાને ઉઠાવ્યો, જે કોંગ્રેસની બદલાતી રાજકીય વ્યૂહરચના તરફ પણ ઈશારો કરે છે. અગાઉ, રાહુલ ગાંધીએ કોંગ્રેસના સાંસદોની બેઠકમાં વંદે માતરમ અને ચૂંટણી સુધારા જેવા મુદ્દાઓ પર પક્ષના પ્રદર્શનની પ્રશંસા કરીને કહ્યું હતું કે સરકાર આ મુદ્દાઓ પર દબાણ હેઠળ છે.
વાયુ પ્રદૂષણના મુદ્દા પર વિપક્ષ અને શાસક પક્ષની આ સહમતિ રાષ્ટ્રીય હિતમાં લેવાયેલા પગલા તરીકે જોવામાં આવે છે. હવે સંસદમાં પ્રદૂષણ પરની ચર્ચા દરમિયાન, માત્ર સમસ્યાની ગંભીરતા જ નહીં, પણ પર્યાવરણ સંરક્ષણ, કળષિ પદ્ધતિઓ, ઔદ્યોગિક ઉત્સર્જન નિયંત્રણો અને જાહેર પરિવહનને સુધારવા જેવા ઉકેલો પર પણ વિગતવાર વિચારણા થવાની અપેક્ષા છે. આ ચર્ચાના પરિણામે દેશને વાયુ પ્રદૂષણ સામે લડવા માટે એક સંયુક્ત અને અસરકારક કાર્ય યોજના મળી શકે છે, જે લાખો લોકોના સ્વાસ્થ્ય માટે રાહતરૂપ સાબિત થશે.
(3:30 PM IST)
છેલ્લા 8 દિવસમાં સૌથી લોકપ્રિય 
