લુથરા બ્રધર્સ થાઈલેન્ડથી દિલ્હી પરતઃ એરપોર્ટ પર ચેક ઈન કર્યુ
પાસપોર્ટ રદ થયા બાદ ઈમરજન્સી સર્ટિફિકેટ પર ડિપોર્ટ કરાયેલા માલિકોને કસ્ટડીમાં લેવાશે
નવી દિલ્હી, તા.૧૬: ગોવાના કુખ્યાત બિર્ચ બાય રોમિયો લેન નાઈટક્લબમાં લાગેલી ભયાનક આગમાં ૨૫ નિર્દોષ લોકોના મોત થયા બાદ ફરાર થયેલા ક્લબના માલિકો સૌરભ લુથ્રા અને ગૌરવ લુથ્રાને આખરે આજે થાઈલેન્ડથી ભારત પાછા લાવવામાં આવી રહ્યા છે. આગની ઘટના બાદ તરત જ વિદેશ ભાગી ગયેલા આ બંને ભાઈઓ હવે કાયદાના સકંજામાં આવી રહ્યા છે. બેંગકોક એરપોર્ટ પર ઇન્ડિગોની ફ્લાઇટમાં ચેક-ઇન કરતી વખતે તેમના ફોટા પણ સામે આવ્યા છે, જે દર્શાવે છે કે તેઓ ભારત સરકાર અને થાઈ પોલીસના દબાણ હેઠળ પરત ફરવા મજબૂર થયા છે. આ ફ્લાઇટ મંગળવારે બપોરે ૨ વાગ્યાની આસપાસ દિલ્હી પહોંચે તેવી શકયતા છે.
લુથ્રા બંધુઓની ધરપકડ થાઈલેન્ડના ફુકેટમાં તેમની હોટલમાંથી ગયા અઠવાડિયે ભારતની વિનંતી પર કરવામાં આવી હતી. ભારત સરકારે તેમની ધરપકડ માટે તેમના પાસપોર્ટ રદ કર્યા હતા અને ઇન્ટરપોલ દ્વારા બ્લુ નોટિસ પણ જારી કરાવી હતી. પાસપોર્ટ રદ થતાં, ભારતીય દૂતાવાસે તેમને ભારત પાછા લાવવા માટે બે ઇમરજન્સી ટ્રાવેલ સર્ટિફિકેટ જારી કર્યા હતા. આ દરમિયાન, તેમની કસ્ટડી લેવા માટે ગોવા પોલીસની એક સાત સભ્યોની ટીમ - જેમાં આઇપીએસ અધિકારીથી લઈને કોન્સ્ટેબલ સુધીના કર્મચારીઓનો સમાવેશ થાય છે - દિલ્હી એરપોર્ટ પર પહોંચી ગઈ છે. આ ટીમ બંને ભાઈઓને કસ્ટડીમાં લઈને તેમને ગોવા લઈ જશે, જ્યાં ક્લબમાં ૨૫ લોકોને જીવતા સળગાવી દેવાની ઘટનાની સઘન તપાસ ચાલી રહી છે.
આ કેસમાં અત્યાર સુધીમાં ક્લબના ચીફ જનરલ મેનેજર રાજીવ મોડક, જનરલ મેનેજર વિવેક સિંહ અને અન્ય અધિકારીઓ સહિત કુલ ચાર લોકોની ધરપકડ થઈ ચૂકી છે. ક્લબના ભાગીદાર અજય ગુપ્તાની પણ દિલ્હીમાં હોસ્પિટલમાંથી ધરપકડ કરવામાં આવી હતી અને તે હાલમાં સાત દિવસની પોલીસ કસ્ટડીમાં છે. લુથ્રા ભાઈઓની ધરપકડ સાથે, આ કેસમાં કાયદાકીય ગતિવિધિ વધુ ઝડપી બનશે. જોકે, ગોવા પોલીસ હાલમાં સાતમા આરોપી સુરિન્દર કુમાર ખોસલાની શોધમાં છે, જેણે ૨૦૨૩ માં ક્લબની માલિકી ધરાવતી કંપની સાથે લીઝ પર હસ્તાક્ષર કર્યા હતા અને તે કથિત રીતે દેશની બહાર છે. પોલીસે અત્યાર સુધીમાં ૬૦ થી વધુ લોકોના નિવેદનો પણ નોંધ્યા છે.
નાઈટક્લબમાં લાગેલી આ આગની ઘટનાએ ગોવામાં સુરક્ષાના ધોરણો અને ગેરકાયદેસર બાંધકામો પર ગંભીર સવાલો ઉભા કર્યા છે. મળતકોમાં મોટાભાગના ક્લબના કર્મચારીઓ હતા, જેમના પરિવારો ન્યાયની માંગ કરી રહ્યા છે. લુથ્રા ભાઈઓને ભારત લાવવામાં આવ્યા છે, પરંતુ ગોવા પોલીસ માટે આગામી પડકાર એ હશે કે આગ લાગવાનું ચોક્કસ કારણ શું હતું, શું આ દુર્ઘટના બેદરકારીનું પરિણામ હતી કે અન્ય કોઈ ષડયંત્ર હતું. ફોલો-અપ રિપોર્ટ દ્વારા જ આગ લાગવાના વાસ્તવિક કારણ પરથી પડદો ઊંચકાશે. આ કેસમાં હવે આરોપીઓની પૂછપરછ અને ફરાર ખોસલાની ધરપકડ નિર્ણાયક સાબિત થશે.
(2:34 PM IST)
છેલ્લા 8 દિવસમાં સૌથી લોકપ્રિય 
