ચંદીગઢ, તા. ૧૬ : રાષ્ટ્રીય સુરક્ષા અધિનિયમ (NSA) હેઠળ આસામની ડિબ્રુગઢ સેન્ટ્રલ જેલમાં બંધ ખાલિસ્તાનના સમર્થક અને પંજાબના ખાદૂર સાહિબનું પ્રતિનિધિત્વ કરતા સાંસદ અમૃતપાલ સિંહ મંગળવારે જામીન મેળવવા માટે પંજાબ અને હરિયાણા હાઈકોર્ટ સમક્ષ હાજર થયા હતા. ૨૦૨૩માં તેમની અટકાયત થયા બાદ આ તેમની પહેલી જાહેર હાજરી છે.

મુખ્ય ન્યાયાધીશ શીલ નાગુ અને ન્યાયાધીશ સંજીવ બેરીની બેન્ચ સમક્ષ અમૃતપાલે વીડિયો કોન્ફરન્સિંગ દ્વારા વ્યક્તિગત રીતે પોતાની દલીલો રજૂ કરી હતી, કારણ કે વકીલોની હડતાળના કારણે તેમણે પોતાનો કેસ જાતે લડવાનો નિર્ણય લીધો હતો.

અમૃતપાલે કોર્ટમાં મુખ્ય દલીલ કરી હતી કે તેમનો જેલવાસ તેમના સંસદીય મતવિસ્તાર ખાદૂર સાહિબના વિકાસને અસર કરી રહ્યો છે અને ત્યાંના તમામ કામકાજ ઠપ્પ થઈ ગયા છે. તેમણે પંજાબમાં પૂર, ડ્રગ્સની સમસ્યા અને તેમના મતવિસ્તારના વિકાસ માટે MPLAD ફંડ જેવા મુદ્દાઓ ઉઠાવવા માટે ચાલુ સંસદ સત્રમાં હાજરી આપવા માટે શરતી જામીન આપવાની પણ માંગણી કરી.

અમૃતપાલે બેન્ચને જણાવ્યું કે, "ભારતની લોકશાહી પ્રણાલીમાં, ચૂંટાયેલા પ્રતિનિધિને સંસદ સમક્ષ મુદ્દાઓ ઉઠાવવાનો અધિકાર છે. પરંતુ મારા પરના આરોપોને વધુ ઉછાળવામાં આવ્યા છે... આ બધા મુદ્દાઓ સંસદ સમક્ષ ઉઠાવવાની જરૂર છે."