અબુ ધાબી: ઇન્ડિયન પ્રીમિયર લીગ (IPL) ૨૦૨૬ માટે અબુ ધાબીના એતિહાદ એરેના ખાતે શરૂ થયેલી મીની હરાજીમાં ઓસ્ટ્રેલિયન ખેલાડીઓનું વર્ચસ્વ જોવા મળ્યું છે, જ્યાં કેમેરોન ગ્રીનને ખરીદવા માટે ફ્રેન્ચાઇઝીઓ વચ્ચે જબરદસ્ત જંગ થયો.
અંતે, કોલકાતા નાઇટ રાઇડર્સ (KKR) એ આ ઓસ્ટ્રેલિયન પાવરહાઉસ ઓલરાઉન્ડરને ₹૨૫.૨૦ કરોડની જંગી રકમમાં ખરીદીને IPL ઇતિહાસમાં સૌથી મોંઘો વિદેશી ખેલાડી બનાવ્યો છે. ગ્રીને તેના જ દેશના ઝડપી બોલર મિચેલ સ્ટાર્કનો ગયા વર્ષનો ₹૨૪.૭૫ કરોડનો રેકોર્ડ તોડી નાખ્યો છે.
દિગ્ગજ ખેલાડીઓ વેચાયા વિના રહ્યા: હરાજીમાં એક તરફ કેટલાક ખેલાડીઓ પર કરોડો રૂપિયાનો વરસાદ થયો, ત્યારે બીજી તરફ ક્રિકેટ જગતના કેટલાક જાણીતા નામોને કોઈ ખરીદદાર મળ્યા ન હતા, જે આ મીની ઓક્શનનો સૌથી મોટો આશ્ચર્યજનક ભાગ છે.
હરાજીના પ્રારંભિક તબક્કામાં વેચાયા વિના રહેલા મુખ્ય ખેલાડીઓ: જોની બેયરસ્ટો (ઇંગ્લેન્ડ), લિયામ લિવિંગસ્ટોન (ઇંગ્લેન્ડ), ક્વિન્ટન ડી કોક (દક્ષિણ આફ્રિકા), પૃથ્વી શો (ભારત), ડેવોન કોનવે (ન્યુઝીલેન્ડ), સરફરાઝ ખાન (ભારત)
હરાજીમાં કુલ ૩૬૯ ખેલાડીઓ પર બોલી લગાવવામાં આવી રહી છે, જેમાંથી મહત્તમ ૭૭ ખેલાડીઓને જ અંતિમ સ્વરૂપ આપવામાં આવશે.