ઉન્નાવ, તા.17: ઉત્તર પ્રદેશના ઉન્નાવ જિલ્લાના એક નાના એવા ગામના યુવકની જીવનશૈલીએ આખા રાજ્યમાં ચર્ચા જગાવી છે, પરંતુ આ ભભકો હવે તેને મુશ્કેલીમાં મૂકી રહ્યો હોય તેમ લાગે છે. અજગૈન વિસ્તારના ભીત્રેપાર ગામના રહેવાસી અને મેડિકલ સ્ટોર સંચાલકના પુત્ર અનુરાગ દ્વિવેદી પર એન્ફોર્સમેન્ટ ડિરેક્ટોરેટ (ED) એ સકંજો કસ્યો છે. માત્ર 15 દિવસ પહેલા જ અનુરાગે દુબઈમાં એક લક્ઝુરિયસ જહાજ પર પોતાના લગ્નનું આયોજન કર્યું હતું, જેમાં તે પોતાના ગામના 20 લોકોને પોતાના ખર્ચે દુબઈ લઈ ગયો હતો. આ ભવ્યતા જ તપાસ એજન્સીઓની નજરમાં આવી ગઈ હતી.

10 ગાડીઓ અને 16 અધિકારીઓનું સર્ચ ઓપરેશન

બુધવારે સવારે જ્યારે ઉન્નાવના નવાબગંજ અને ભીત્રેપાર ખજુર ગામમાં EDની 10 ગાડીઓનો કાફલો પહોંચ્યો ત્યારે ગ્રામજનોમાં અફરાતફરી મચી ગઈ હતી. 16 સભ્યોની આ ટીમે અનુરાગના નિવાસસ્થાન, તેમના કાકા નરપેન્દ્ર નાથ દ્વિવેદીના ઘર, ગન હાઉસ, મેડિકલ સ્ટોર અને હાર્ડવેર શોપ પર એકસાથે દરોડા પાડ્યા હતા. જે સમયે દરોડા પડ્યા તે સમયે અનુરાગ ઘરે હાજર નહોતો, પરંતુ ટીમે કલાકો સુધી મિલકતના દસ્તાવેજોની ઝીણવટભરી તપાસ કરી હતી.

ગેમિંગ પ્રમોટર કે સટ્ટાબાજીનું નેટવર્ક?

અનુરાગ દ્વિવેદી સોશિયલ મીડિયા અને ફૅન્ટેસી સ્પોર્ટ્સ પ્લેટફોર્મ (જેમ કે Dream11, MyCircle) પર પ્રમોટર અને કન્ટેન્ટ ક્રિએટર તરીકે જાણીતો છે. જોકે, એવી શંકા સેવાઈ રહી છે કે તે માત્ર એન્ડોર્સમેન્ટથી જ નહીં, પરંતુ ભારતથી દુબઈ સુધી ફેલાયેલા ઓનલાઈન સટ્ટાબાજી અને જુગારના નેટવર્ક દ્વારા કરોડોની કમાણી કરી રહ્યો છે. EDને શંકા છે કે આ પ્લેટફોર્મ્સ દ્વારા મેળવેલી રકમનું રોકાણ અપ્રમાણસર સંપત્તિ ઊભી કરવા માટે કરવામાં આવ્યું છે.

સ્થાનિક પોલીસ પણ અજાણ

આ સમગ્ર દરોડાની કાર્યવાહી એટલી ગુપ્ત રાખવામાં આવી હતી કે સ્થાનિક પોલીસને પણ તેની આગોતરી જાણ કરવામાં આવી નહોતી. CO અરવિંદ ચૌરસિયાએ પુષ્ટિ કરી હતી કે ટીમ આવી છે પરંતુ સત્તાવાર રીતે પોલીસનો સંપર્ક કરવામાં આવ્યો નથી. હાલમાં તપાસ ચાલુ છે અને જપ્ત કરાયેલા દસ્તાવેજોમાંથી મોટા ખુલાસા થવાની શક્યતા છે.