નવી દિલ્હી, તા.17: જો તમે પણ સોશિયલ મીડિયા પર કલાકો સુધી રીલ્સ જોતા હોવ અને ફોનની નાની સ્ક્રીન પર આંખો ખેંચાતી હોય, તો તમારા માટે ખુશખબર છે. મેટાની માલિકી ધરાવતી કંપની ઇન્સ્ટાગ્રામે સત્તાવાર રીતે જાહેરાત કરી છે કે તેઓ હવે ટીવી માટે ખાસ 'રીલ્સ-સેન્ટ્રિક' (Reels-focused) એપ્લિકેશન લાવી રહ્યા છે. આ નવી પહેલથી હવે તમે તમારા બેડરૂમ કે હોલમાં બેસીને આખા પરિવાર સાથે ટ્રેન્ડિંગ વીડિયોનો આનંદ માણી શકશો.

કેવી રીતે કામ કરશે આ નવી TV એપ?

ટીવી માટેની આ ઇન્સ્ટાગ્રામ એપ મોબાઈલ એપ કરતા થોડી અલગ અને ખાસ છે. તેમાં લોગ-ઈન કરતાની સાથે જ તમને અલગ-અલગ 'ચેનલ્સ' જોવા મળશે. તમારી પસંદગી મુજબ તમે મ્યુઝિક, સ્પોર્ટ્સ, ટ્રાવેલ કે કોમેડી જેવી કેટેગરી પસંદ કરી શકશો. હોમ સ્ક્રીન પર તમને વીડિયોના થંબનેલ્સનો આડો (Horizontal) સંગ્રહ દેખાશે, જેના પર ક્લિક કરતા જ ફૂલ સ્ક્રીન પોટ્રેટ વીડિયો પ્લે થશે.

ટીવી રિમોટથી જ થશે કંટ્રોલ

મોબાઈલની જેમ જ ટીવી પર પણ અનુભવ સરળ રહેશે. તમે રિમોટની મદદથી ઉપર સ્વાઈપ કરીને બીજી રીલ જોઈ શકશો. સ્ક્રીન પર બાજુમાં કેપ્શન્સ અને લાઈક્સ-વ્યુઝના આંકડા પણ દેખાશે. કંપનીનું માનવું છે કે રીલ્સ એવી વસ્તુ છે જે લોકો સમૂહમાં જોવાનું પસંદ કરે છે, અને આ એપ તે અનુભવને વધુ શાનદાર બનાવશે.

હાલમાં ક્યાં ઉપલબ્ધ છે?

હાલમાં આ 'રીલ્સફર્સ્ટ' એપ્લિકેશનનું યુએસ (US) માં ટેસ્ટિંગ ચાલી રહ્યું છે. એમેઝોન ફાયર ટીવી (Amazon Fire TV) ઉપકરણો પર તેને પાયલોટ પ્રોજેક્ટ તરીકે લોન્ચ કરવામાં આવી છે. આ પરીક્ષણ સફળ રહ્યા બાદ ટૂંક સમયમાં જ ભારત સહિત વિશ્વભરના એન્ડ્રોઇડ ટીવી અને સ્માર્ટ ટીવી યુઝર્સ માટે આ ફીચર રોલ-આઉટ કરવામાં આવશે.