નવી દિલ્હી, તા.17: અમેરિકી રાષ્ટ્રપતિ ડોનાલ્ડ ટ્રમ્પ દ્વારા વિવિધ દેશો પર લાદવામાં આવેલા ભારે ટેરિફ (આયાત શુલ્ક) ને કારણે સમગ્ર વિશ્વની અર્થવ્યવસ્થામાં ભૂકંપ આવ્યો છે. આ વૈશ્વિક વેપાર યુદ્ધ વચ્ચે ભારતના નાણામંત્રી નિર્મલા સીતારમણે ટ્રમ્પના એજન્ડાનો પર્દાફાશ કરતા એક અત્યંત ગંભીર નિવેદન આપ્યું છે. તેમણે સ્પષ્ટપણે જણાવ્યું છે કે હવે આંતરરાષ્ટ્રીય વેપાર ન્યાયી રહ્યો નથી, પરંતુ તેનો ઉપયોગ એક 'હથિયાર' તરીકે કરવામાં આવી રહ્યો છે.

ટેરિફ પાછળની 'મોટી રમત'

ટાઇમ્સ નેટવર્ક ઇન્ડિયા ઇકોનોમિક કોન્ક્લેવ 2025 માં સંબોધન કરતા નિર્મલા સીતારમણે કહ્યું કે, અમેરિકા જેવી મહાસત્તાઓ હવે ટેરિફનો ઉપયોગ માત્ર વેપાર માટે નહીં પણ અન્ય દેશો પર દબાણ લાવવા માટે કરી રહી છે. તેમણે ભાર મૂક્યો કે અત્યાર સુધી ભારત પર 'ટેરિફ કિંગ' હોવાનો આરોપ લાગતો હતો, પરંતુ આજે વિકસિત દેશો પણ ખુલ્લેઆમ ઊંચા ટેરિફ લાદી રહ્યા છે. આ બદલાતી વૈશ્વિક વ્યવસ્થાને તેમણે "નવું સામાન્ય" (New Normal) ગણાવ્યું હતું.

ભારતની રણનીતિ: રક્ષણ પણ, આક્રમકતા નહીં

નાણામંત્રીએ સ્પષ્ટ કર્યું કે ભારતની ટેરિફ નીતિ કોઈ દેશને નુકસાન પહોંચાડવા માટે નથી. ભારતે તેના સ્થાનિક ઉદ્યોગોને વિદેશી કંપનીઓના 'ડમ્પિંગ' (સસ્તો માલ ઠાલવવો) થી બચાવવા માટે જ ટેરિફનો સહારો લીધો છે. સીતારમણે કહ્યું કે, "ભારતે ક્યારેય વેપારને હથિયાર તરીકે વાપર્યો નથી. અમે ફક્ત અમારા નાના વેપારીઓ અને ઉદ્યોગોના હિતનું રક્ષણ કરીએ છીએ."

આર્થિક શક્તિ એ જ સૌથી મોટો ફાયદો

ભારત આગામી સમયમાં આ ટેરિફ વોરનો સામનો કેવી રીતે કરશે તે અંગે વાત કરતા તેમણે કહ્યું કે, માત્ર વાટાઘાટોથી કામ નહીં ચાલે. ભારતની વધતી જતી આર્થિક શક્તિ અને વિશાળ બજાર જ આપણને વૈશ્વિક મંચ પર ફાયદો કરાવી આપશે. જ્યારે અમેરિકામાં પણ ટ્રમ્પની આ નીતિઓને કારણે ફુગાવો વધી રહ્યો છે અને સામાન્ય જનતા પર બોજ પડ્યો છે, ત્યારે ભારતની સંતુલિત અને વિચારપૂર્વકની નીતિ લાંબા ગાળે આર્થિક સ્થિરતા માટે વરદાન સાબિત થશે.

રૂપિયાના અવમૂલ્યન અને વૈશ્વિક બજારની અનિશ્ચિતતા વચ્ચે નાણામંત્રીનું આ નિવેદન ભારતીય ઉદ્યોગ જગત માટે આશાનું કિરણ લઈને આવ્યું છે.