પટણા, તા.17: બિહારના રાજકારણમાં છેલ્લા બે દાયકાથી જેમના નામનો સિક્કો પડે છે, તેવા મુખ્યમંત્રી નીતીશ કુમાર અને '7' (સાત) નંબર વચ્ચે કોઈ ગજબનું જોડાણ હોય તેવું લાગે છે. અંકશાસ્ત્રમાં રસ ધરાવતા લોકો માટે નીતીશ કુમારની રાજકીય સફર એક અભ્યાસનો વિષય બની ગઈ છે. ભલે તેને સંયોગ કહો કે ભાગ્ય, પણ નીતીશ કુમારના જીવન અને કારકિર્દીના દરેક મહત્વના વળાંક પર સાત નંબરની હાજરી અચૂક જોવા મળી છે.

જન્મથી જ જોડાયો છે 'સાત'નો સાથ

નીતીશ કુમારના જીવનમાં સાત નંબરની એન્ટ્રી તેમના જન્મ સાથે જ થઈ ગઈ હતી. તેમનો જન્મ 1 માર્ચ, 1951ના રોજ થયો હતો. જો તમે તેમના જન્મ વર્ષ (1+9+5+1) ના અંકોનો સરવાળો કરશો, તો તે 16 થાય છે, અને તેમાં જન્મ તારીખનો 1 ઉમેરતા કુલ 17 થાય છે, જેનો છેલ્લો અંક '7' છે. આટલું જ નહીં, તેમણે રાજકારણમાં સત્તાવાર પ્રવેશ 1977 માં કર્યો હતો, જેમાં પણ સાતનો આંકડો બે વાર આવે છે.

ગાડીનો નંબર 777 અને નિવાસસ્થાન પણ 7!

જ્યારે નીતીશ કુમાર પ્રથમ વખત બિહારના મુખ્યમંત્રી બન્યા ત્યારે તેમને જે સત્તાવાર ગાડી ફાળવવામાં આવી હતી, તેનો નંબર 777 હતો. વધુમાં, તેઓ પટણામાં જે સરકારી બંગલામાં રહે છે, તેનો નંબર પણ 7, સર્ક્યુલર રોડ છે. વર્ષ 1987 માં જ્યારે તેઓ પ્રથમવાર યુવા લોકદળના અધ્યક્ષ બન્યા, ત્યારે પણ વર્ષના અંતે 7 નો આંકડો આવતો હતો.

વિકાસનો રોડમેપ: 'સાત નિશ્ચય'

નીતીશ કુમારે માત્ર અંગત જીવનમાં જ નહીં, પણ બિહારના વહીવટમાં પણ સાત નંબરને પ્રાધાન્ય આપ્યું છે. તેમણે બિહારના વિકાસ માટે જે સૌથી મોટી યોજના બનાવી, તેનું નામ પણ "સાત નિશ્ચય" રાખ્યું. તાજેતરમાં જ કેબિનેટ બેઠકમાં "સાત નિશ્ચય ભાગ-3 (2025-2030)" ને મંજૂરી આપવામાં આવી છે. આ યોજના દ્વારા બિહારને 2030 સુધીમાં દેશના સૌથી વિકસિત રાજ્યોની હરોળમાં લાવવાનો લક્ષ્યાંક રાખવામાં આવ્યો છે.

રાજકીય પંડિતો માને છે કે નીતીશ કુમાર માટે સાત નંબર અત્યંત શુકનિયાળ સાબિત થયો છે. 1977 થી શરૂ થયેલી આ સફર 2025 માં પણ એટલી જ મજબૂતી સાથે આગળ વધી રહી છે, જે આ આંકડા સાથેના તેમના અતૂટ સંબંધને સાબિત કરે છે.