કોલકાતા : પશ્ચિમ બંગાળના મુખ્યમંત્રી મમતા બેનર્જીએ આજે લઘુમતી અધિકાર દિવસ નિમિત્તે સોશિયલ મીડિયા પ્લેટફોર્મ ‘X’ પર એક મહત્વપૂર્ણ પોસ્ટ કરી છે. તેમણે દાવો કર્યો છે કે વર્ષ ૨૦૧૧માં TMC (તૃણમૂલ કોંગ્રેસ) સત્તામાં આવ્યા બાદ રાજ્યમાં લઘુમતી બાબતોના વિભાગના બજેટમાં આશરે દસ ગણો વધારો કરવામાં આવ્યો છે. મમતાએ જણાવ્યું કે જે બજેટ ૨૦૧૦-૧૧માં માત્ર રૂ. ૪૭૨ કરોડ હતું, તે હવે ૨૦૨૫-૨૬માં વધીને રૂ. ૫,૬૦૨ કરોડથી વધુ થઈ ગયું છે.

‘ઐક્યશ્રી’ અને ‘મેધાશ્રી’ યોજનાનો કરિશ્મા

મુખ્યમંત્રીએ ગૌરવપૂર્વક જણાવ્યું કે પશ્ચિમ બંગાળ આજે લઘુમતી શિષ્યવૃત્તિ વિતરણમાં સમગ્ર દેશમાં પ્રથમ સ્થાને છે. રાજ્યની ‘ઐક્યશ્રી’ યોજના હેઠળ અત્યાર સુધીમાં ૪.૮૫ કરોડ વિદ્યાર્થીઓને ૧૦,૨૦૦ કરોડ રૂપિયાથી વધુની સહાય પૂરી પાડવામાં આવી છે. આ ઉપરાંત, લઘુમતી અને OBC વિદ્યાર્થીઓ માટે ‘મેધાશ્રી’ યોજના પણ ચલાવવામાં આવી રહી છે, જેથી શિક્ષણના સ્તરને વધુ ઊંચું લાવી શકાય.

ઉચ્ચ અભ્યાસ અને રોજગાર માટે લોનનો વરસાદ

માત્ર શાળાકીય શિક્ષણ જ નહીં, પરંતુ ઉચ્ચ અભ્યાસ માટે પણ રાજ્ય સરકાર લઘુમતી વિદ્યાર્થીઓની પડખે ઉભી છે. મુખ્યમંત્રીના જણાવ્યા અનુસાર, ભારત કે વિદેશમાં ઉચ્ચ અભ્યાસ કરવા ઈચ્છતા વિદ્યાર્થીઓને ૩૦ લાખ રૂપિયા સુધીની એજ્યુકેશન લોન આપવામાં આવે છે. સ્વ-રોજગારના ક્ષેત્રમાં પણ છેલ્લા ૧૫ વર્ષોમાં ૧૬.૩૧ લાખ લાભાર્થીઓને ૩,૯૨૬ કરોડ રૂપિયાની લોન આપીને આત્મનિર્ભર બનાવવામાં આવ્યા છે.

માળખાગત સુવિધાઓ અને ભાષાકીય સન્માન

લઘુમતી બહુલ વિસ્તારોમાં વિકાસના કામો પર ભાર મૂકતા મમતાએ કહ્યું કે, MSDP (બહુ-ક્ષેત્રીય વિકાસ કાર્યક્રમ) હેઠળ ૪,૫૦૦ કરોડ રૂપિયા ખર્ચાયા છે. શિક્ષણ ક્ષેત્રે અંગ્રેજી માધ્યમની મોડેલ મદ્રેસાઓ અને આલિયા યુનિવર્સિટીના નવા કેમ્પસ વિકસાવવામાં આવ્યા છે. સાથે જ, જે વિસ્તારોમાં ૧૦ ટકાથી વધુ વસ્તી ઉર્દૂ બોલે છે, ત્યાં ઉર્દૂને સત્તાવાર ભાષાનો દરજ્જો આપીને ભાષાકીય સન્માન જાળવવામાં આવ્યું છે.

રાજારહાટ ન્યુ ટાઉનમાં ભવ્ય ‘હજ હાઉસ’નું નિર્માણ અને ઇમામ તેમજ મુએઝીન માટેની કલ્યાણકારી યોજનાઓ દ્વારા રાજ્ય સરકાર છેવાડાના માનવી સુધી પહોંચી હોવાનું મુખ્યમંત્રીએ ભારપૂર્વક જણાવ્યું હતું.