તા. ૨૮ નવેમ્બરે ર૦ર૫ વિક્રમ સંવત ર૦૮૨ માગશર સુદ – ૮ શુક્રવાર
બાંગ્લાદેશમાં સ્થિતિ ‘આઉટ ઓફ કંટ્રોલ': અખબારોની કચેરીઓ ઉપર હૂમલાઃ ૨૫ પત્રકાર મરતા-મરતા બચ્યા
ધ ડેઇલી સ્ટાર ઓફિસના ગ્રાઉન્ડ અને પહેલા માળે વ્યાપક તોડફોડ કરવામાં આવી, ત્યારબાદ તેઓએ રાત્રે ૧૨:૩૦ વાગ્યાની આસપાસ તેને આગ લગાવી દીધી, આગ ઝડપથી ફેલાઈ ગઈ, થોડીવારમાં બે માળને લપેટમાં લઈ ગઈ
ઢાકા, તા.૧૯: બાંગ્લાદેશની રાજધાની ઢાકામાં ગુરુવારે મોડી રાત્રે ભયાનક હિંસા ફાટી નીકળી. ૨૦૨૪ ના વિદ્યાર્થી ચળવળના અગ્રણી નેતા અને ઇન્કિલાબ મંચના પ્રવક્તા શરીફ ઓસ્માન હાદીના સિંગાપોરમાં મળત્યુના સમાચાર બાદ, ટોળાએ અનેક સ્થળોએ આગ લગાવી. હાદીના મળત્યુ બાદ, ગુસ્સે ભરાયેલા વિરોધીઓએ દેશના બે અગ્રણી અખબારો, પ્રથમ આલો અને ડેઇલી સ્ટારની ઓફિસો પર હુમલો કર્યો.
અંગ્રેજી અખબાર ધ ડેઇલી સ્ટારની ઓફિસો પર ટોળાએ હુમલો કર્યા બાદ લગભગ ચાર કલાક સુધી અંદર ફસાયેલા ઓછામાં ઓછા ૨૫ પત્રકારોને આખરે સુરક્ષિત રીતે બચાવી લેવામાં આવ્યા. અહેવાલો અનુસાર, શુક્રવારે મધ્યરાત્રિ ૧૨ વાગ્યાની આસપાસ ગુસ્સે ભરાયેલા ટોળાએ ધ ડેઇલી સ્ટાર ઓફિસ પર હુમલો કર્યો. અગાઉ, એક ટોળાએ અગ્રણી બંગાળી દૈનિક પ્રથમ આલોના કાર્યાલયને નિશાન બનાવ્યું હતું. સૂત્રોચ્ચાર કરતા ટોળાએ પહેલા કાર્યાલયમાં તોડફોડ કરી અને પછી તેને આગ લગાવી દીધી.
ડેઇલી સ્ટાર કાર્યાલયમાં, હુમલાખોરોએ પહેલા ગ્રાઉન્ડ અને પહેલા માળે વ્યાપક તોડફોડ કરી. ત્યારબાદ બપોરે લગભગ ૧૨:૩૦ વાગ્યે આગ લગાવવામાં આવી. આગ ઝડપથી ફેલાઈ ગઈ, થોડીવારમાં બે માળને ઘેરી લીધી. દૂરથી ગાઢ ધુમાડો દેખાઈ રહ્યો હતો. અખબારના પત્રકારોએ બીડી ન્યૂઝને જણાવ્યું કે ભીડે રસ્તો રોકી રાખ્યો હોવાથી ફાયર બ્રિગેડના વાહનો લાંબા સમય સુધી ઘટનાસ્થળે પહોંચી શકયા નહીં.
આગ અને ધુમાડામાં ફસાયેલા, પત્રકારોએ આખી રાત છત પર આશરો લીધો, ફોન કોલ્સ અને સોશિયલ મીડિયા પોસ્ટ દ્વારા મદદ માટે વિનંતી કરી. ડેઇલી સ્ટારના પત્રકાર, ઝૈમા ઇસ્લામે અંદરથી સંદેશ મોકલ્યો, જેમાં લખ્યું, હું હવે શ્વાસ લઈ શકતી નથી. ખૂબ ધુમાડો છે. હું અંદર ફસાઈ ગઈ છું. તમે મને મારી રહ્યા છો. અગ્નિશામકોએ રાત્રે ૨ વાગ્યાની આસપાસ આગ પર કાબુ મેળવ્યો. જોકે, આગ બુઝાયા પછી પણ, પત્રકારોને તાત્કાલિક બહાર કાઢી શકાયા નહીં કારણ કે ટોળું ફરીથી ઇમારતમાં ઘૂસી ગયું.
પરિસ્થિતિ કાબુ બહાર જતા, ડેઇલી સ્ટાર ઇમારતની સામે સેના તૈનાત કરવામાં આવી. સવારે ૪ વાગ્યાની આસપાસ, સૈનિકોની દેખરેખ હેઠળ પત્રકારોને સુરક્ષિત રીતે બહાર કાઢવામાં આવ્યા. આ સમય દરમિયાન ન્યૂ એજ અખબારના સંપાદક નુરુલ કબીર પણ હાજર હતા, તેઓ ભીડ સાથે વાત કરવા આવ્યા હતા, પરંતુ તેમના પર પણ હુમલો કરવામાં આવ્યો.
વિરોધીઓએ આ અખબારોનો ભારત તરફી હોવાનો અને શેખ હસીના પ્રત્યે નરમ વલણ અપનાવવાનો આરોપ લગાવ્યો. ૨૦૨૪ના વિદ્યાર્થી આંદોલન પછી હસીનાએ ભારતમાં આશ્રય લીધો છે. હાદી પોતે ભારત અને હસીનાના કટ્ટર ટીકાકાર હતા અને આગામી ચૂંટણીઓ સ્વતંત્ર ઉમેદવાર તરીકે લડવાની યોજના બનાવી રહ્યા હતા.
આ હિંસા એવા સમયે થઈ છે જ્યારે બાંગ્લાદેશના મુખ્ય સલાહકાર મુહમ્મદ યુનુસે નાગરિકોને શાંતિ અને સંયમ જાળવવા અપીલ કરી હતી. તેમણે નાગરિકોને કાયદો અને વ્યવસ્થા જાળવવા અને તપાસ એજન્સીઓને તેમનું કાર્ય વ્યાવસાયિક રીતે કરવા દેવા વિનંતી કરી.
રાષ્ટ્રને સંબોધતા, યુનુસે કહ્યું, હું દેશના તમામ નાગરિકોને ધીરજ અને સંયમ જાળવવાની નિષ્ઠાપૂર્વક અપીલ કરું છું. કાયદા અમલીકરણ એજન્સીઓ અને સંબંધિત સંસ્થાઓને તેમની તપાસ વ્યાવસાયિક રીતે કરવા દો. રાજ્ય કાયદાનું શાસન સ્થાપિત કરવા અને લોકશાહી પ્રગતિને પ્રોત્સાહન આપવા માટે સંપૂર્ણપણે પ્રતિબદ્ધ છે. હાલમાં, ઢાકામાં પરિસ્થિતિ તણાવપૂર્ણ છે, અને મીડિયા સંગઠનો પરના હુમલાની સખત નિંદા કરવામાં આવી રહી છે.
(10:47 AM IST)
છેલ્લા 8 દિવસમાં સૌથી લોકપ્રિય 
